Göyçay rayonunda 4 avtomobilin iştirakı ilə zəncirvari yol qəzası baş verib.
NOCOMMENT apa-ya istinadla xəbər verir ki, hadisə bu gün saat 16 radələrində Göyçay şəhərinin Nizami küçəsində qeydə alınıb. Yolda sürətlə hərəkət edən “VAZ 2107” minik avtomobilinin sürücüsü idarəetməni itirib, avtomobil yoldan çıxaraq kənarda dayanmış “VAZ 2106”, “VAZ 21011” və “VAZ 2107” avtomobillərə çırpılıb. Sonra “VAZ 2107” avtomobili elektrik dirəyini aşırıb, “Telefon evi” adlı mağazanın pəncərəsindən içəri daxil olub. Hadisə zamanı mağazanın qarşısındakı piyada səkisində olan bir nəfər və avtomobillərdə olan 3 nəfər xəsarət alıb. Xəsarət alanlar Göyçay rayon Mərkəzi Xəstəxanasına aparılıb.
Telefon mağazasının sahibi Rauf Musayev bildirib ki, hadisə zamanı mağazadakı işçilər xəsarət almasa da, çox həyəcanlanıblar.
Qəza zamanı obyektin pəncərələri, içəridəki vitrinlər, mobil telefonlar, təmir avadanlıqları, aksesuarlar sınıb. Sahibkara ümumilikdə 4 min manatdan çox maddi ziyan dəyib.
Faktla bağlı Göyçay rayon Polis Şöbəsi tərəfindən araşdırma aparılır.
