NOCOMMENT.az Rusiya mətbuatına istinadən xəbər verir ki, İsrailin xarici işlər naziri Eli Koen beynəlxalq ictimaiyyəti Qəzza zolağının HƏMAS-dan azad edilməsinə nail olmağa çağırıb. Cenevrədə keçirdiyi mətbuat konfransında o, həmçinin bildirib ki, radikal qruplaşmanın əlində olan girovlar dərhal azad edilməlidir.
“Biz bütün mülki vətəndaşların, uşaqların, qadınların, qocaların dərhal azad edilməsinə çağırış etmək üçün buradayıq… Beynəlxalq ictimaiyyət açıq şəkildə deməlidir: “Qəzzanı HƏMAS-dan azad edin!””, – deyə Koen bildirib.
O, hadisələrin bu cür inkişafının təkcə İsrailin deyil, həm də anklavın mülki əhalisinin təhlükəsizliyi üçün zəruri olduğunu vurğulayıb.
“Biz İsrail dövləti üçün mübarizə aparırıq, eyni zamanda insan ləyaqəti üçün də mübarizə aparırıq… Biz qalib gəlməsək, növbəti siz olacaqsınız”, – XİN rəhbəri bildirib.
