Ukrayna “BMT Nizamnaməsinin prinsiplərinə uyğun olaraq ədalətli və davamlı sülhə” nail olana qədər onu dəstəkləməyə davam etmək vacibdir.
NOCOMMENT.az xəbər verir ki, bunu ABŞ Prezidenti Co Bayden Almaniya Prezidentinin Berlindəki iqamətgahında ona Almaniyanın ən yüksək fəxri adı – Almaniya Federativ Respublikasının xüsusi dərəcəli “Xidmətlərə görə Böyük Xaç” ordeni ilə təltif olunma mərasimi zamanı deyib.
“Bizi çox çətin qış gözləyir, amma dayana bilmərik. Biz dəstəyi davam etdirməliyik. Fikrimcə, biz Ukrayna BMT Nizamnaməsinin prinsiplərinə uyğun olaraq ədalətli və davamlı sülhə nail olana qədər davam etməliyik. İnsan ləyaqəti yenidən hökmranlıq edənə qədər”, – deyə Bayden bildirib.
Amerika lideri Rusiya Federasiyasının Ukraynaya qarşı təcavüzkar müharibəsinə birgə qarşı çıxmağın vacibliyini qeyd edib.
“Vahid və azad Avropa arzusu zəmanəmizin vəzifəsi olaraq qalır. Və bu vəzifə Putinin Ukraynaya qarşı amansız hücumuna müqavimət göstərmək zərurətinə görə daha da aktuallaşır”, – deyə o bildirib.
Bayden Almaniyanın rəhbərliyinə Ukraynanın qələbəsini təmin etmək üçün göstərdikləri səylərə görə təşəkkür edib.
“Alman liderlərinin tarixi dönüş nöqtəsini – başqa bir demokratiyaya, eləcə də 75 il ərzində Avropada sülh və təhlükəsizliyi qoruyub saxlayan prinsiplərə hücumu tanımaq müdrikliyi var idi”. Almaniya və ABŞ azadlıq, demokratiya və öz sağ qalmaları uğrunda mübarizədə cəsur Ukrayna xalqını dəstəkləyərək bir yerdə dayandılar. Mən Ukraynanın qalib gəlməsi, Putinin məğlub olması və NATO-nun həmişəkindən daha güclü və birləşmiş qalması üçün yorulmadan çalışan Almaniya hökumətindəki hər bir liderə təşəkkür etmək istəyirəm”, – deyə ABŞ prezidenti bildirib.
Xatırladaq ki, oktyabrın 17-dən 18-nə keçən gecə ABŞ prezidenti Co Bayden müttəfiqləri ilə Ukraynadakı müharibəni müzakirə etməyi planlaşdırdığı Almaniyaya uçmuşdu.
