Rusiya və İndoneziya Hərbi Dəniz Qüvvələri İndoneziyanın Surabaya şəhərində tarixdə ilk birgə “Orruda 2024” təliminə başlayıb.
NOCOMMENT.az xəbər verir ki, bu barədə RİA Novosti məlumat yayıb.
Noyabrın 4-də başlayan təlim, müvafiq olaraq Surabaya və Yava dənizində baş tutacaq baza və dəniz fazalarını əhatə etməklə noyabrın 8-dək davam edəcək.
Təlimlərin açılış mərasimində İndoneziya Hərbi Dəniz Qüvvələrinin komandanı və Sakit Okean Donanmasının müxtəlif qüvvələrinin Primorsk flotiliyasının komandiri kontr-admiral Aleksey Susuev iştirak edib. Mərasim zamanı tərəflər arasında yaddaqalan hədiyyələr, o cümlədən Rusiya Hərbi Dəniz Qüvvələrinin tarixinə həsr olunmuş suvenirlər və rus şokoladı mübadiləsi aparılıb.
Rusiyanın İndoneziyadakı səfiri Sergey Tolçenov hərbi əməkdaşlığın dövlətlərarası əlaqələrin təbii bir hissəsi olduğunu vurğulayaraq, hər iki ölkənin hərbi dəniz qüvvələri arasında dərin və səmimi münasibətlərdən məmnunluğunu ifadə edib. “Bu günlərdə Surabaya və Yava dənizində təşkil olunacaq hərbi dəniz təlimləri xalqlarımız arasında əlaqələrin və möhkəm dostluğun yaxşı təsdiqi olacaq”, – o qeyd edib.
