Qırğızıstan COP29-da dağlıq rayonların dayanıqlı inkişafı layihəsini təqdim edəcək.
NOCOMMENT.az xəbər verir ki, Report-un Bişkekə ezam olunmuş əməkdaşının məlumatına görə, bunu Qırğızıstanın xarici işlər naziri Jeenbek Kulubayev Türk Dövlətləri Təşkilatına (TDT) üzv ölkələrin Xarici İşlər Nazirləri Şurasının iclasının açılışında bildirib.
“Qlobal iqlim dəyişikliyi dayanıqlı inkişafı təhdid edir və Qırğızıstan beynəlxalq səviyyədə dağlıq ərazilərlə bağlı gündəliyini irəli sürür”, – nazir vurğulayıb.
O, həmçinin Azərbaycana COP29-un keçirilməsində uğurlar arzulayıb və TDT tərəfindən təşəbbüsün dəstəklənəcəyinə ümidvar olduğunu bildirib:
“Ümid edirəm ki, Bakıda keçiriləcək COP29-da bu təşəbbüsü dəstəkləyəcəksiniz. Mən həmçinin Azərbaycan və Braziliyaya (COP30 konfransı Braziliyanın Belem şəhərində keçiriləcək – red.) bu mühüm tədbirlərin keçirilməsində uğurlar arzulayıram. Sizi noyabrın 13-də dağlıq ərazilərlə bağlı gündəlik və iqlim məsələləri üzrə yüksək səviyyəli iclaslarda iştirak etməyə dəvət edirəm”.
