Şirvan Şəhər Məhkəməsində xuliqanlıqda təqsirləndirilən Zamin Lətifovun (şərti) cinayət işi üzrə məhkəmə istintaqı yekunlaşıb.
NOCOMMENT.az-ın əldə etdiyi məlumata görə, hakim Ceyhun Mustafayevin sədrliyi ilə keçirilən prosesdə hökm oxunub.
Məhkəmənin hökmü ilə o, 3 il müddətinə azadlıqdan məhrum edilib.
İttihama görə, hadisə 18 avqust 2024-cü il tarixdə saat 21 Şirvan şəhəri Vidadi küçəsində yerləşən “Deman” adlı kafedə qeydə alınıb.
Belə ki, Zamin Lətifov, dostu, zərərçəkmiş Hikmət Qurbanovla mübahisə edib. Buna səbəb isə zərərçəkmişin ona spirtli içkidən az içməsini deməsi olub. Bu zaman o, Hikmətin ünvanına ucadan nalayiq ifadələr işlədib, sonra yumruqla onun bədəninin müxtəlif hissələrindən bir neçə dəfə qəsdən vurub. Daha sonra Zamin yaşadığı evə gedib, bıçağı götürərək, saat 23 radələrində Hikmətin evinin qarşısına gəlib. O, zərərçəkmişi küçəyə çağırıb bıçaqla onun bədəninin müxtəlif nahiyələrinə qəsdən vuraraq xəsarətlər yetirib.
Hadisədən sonra Zamin Lətifov saxlanılaraq cinayət məsuliyyətinə cəlb edilib.
Qeyd: Zamin Lətifov əvvəllər xuliqanlıq əməli törətdiyinə görə hbs edilərək məhkumluq həyatı yaşayıb.
