Kanadanın Rəqabətə Nəzarət Bürosu cümə axşamı verdiyi açıqlamada, “Google”un onlayn reklam sahəsində rəqabətə zidd davranışlara görə məhkəməyə verildiyini bildirib.
NOCOMMENT.az xəbər verir ki, iddiada şirkətdən iki əsas reklam texnologiyası xidmətini satması və cərimə ödəməsi tələb olunur.
Büronun araşdırması nəticəsində müəyyən edilib ki, “Google” reklam texnologiyası alətlərini qanunsuz şəkildə birləşdirərək bazardakı dominant mövqeyini qoruyub saxlayıb.
Məsələ artıq Rəqabət Tribunalına göndərilib. Bu yarım-hüquqi qurum, Rəqabət Komissarı tərəfindən Rəqabət Aktına uyğun olmayan davranışlara dair irəli sürülən işləri araşdırır.
Büro, tribunaldan “Google”un “DoubleClick for Publishers” reklam serverini və “AdX” reklam mübadiləsi platformasını satmasını tələb edir. Araşdırmaya görə, “Google” reklam serverləri bazarının 90%-nə, reklam şəbəkələrinin 70%-nə, tələbyönümlü platformaların 60%-nə və reklam mübadilələrinin 50%-nə nəzarət edir.
Bu dominant mövqe, Büroya görə, rəqiblərin bazara daxil olmasını çətinləşdirir, innovasiyaları məhdudlaşdırır, reklam xərclərini artırır və nəşriyyatların gəlirlərini azaldır.
Rəqabət Komissarı Metyu Bosuell (Matthew Boswell) məsələ ilə bağlı açıqlamasında bildirib:
“Google” Kanadada onlayn reklam sahəsində dominant mövqeyindən sui-istifadə edib. Şirkət bazar iştirakçılarını öz reklam texnologiya alətlərindən istifadə etməyə məcbur edir, rəqibləri bazardan uzaqlaşdırır və rəqabət prosesini təhrif edir.”
“Google” isə onlayn reklam bazarının yüksək rəqabətli bir sahə olduğunu müdafiə edir.
Şirkətin qlobal reklamlar üzrə vitse-prezidenti Den Teylor (Dan Taylor) verdiyi açıqlamada bildirib ki, Büronun iddiası reklam alıcıları və satıcılarının çoxsaylı seçimlərinin olduğu intensiv rəqabəti nəzərə almır. Şirkət bu iddialara qarşı müdafiə olunmağı planlaşdırır.
ABŞ-da isə tənzimləyicilər “Google”un dominant mövqeyindən istifadə edərək rəqabəti sıxışdırmasını dayandırmaq üçün federal məhkəmədən şirkətin bölünməsini tələb ediblər.
Ədliyyə Nazirliyinin bu ay təqdim etdiyi 23 səhifəlik sənəddə təklif edilən cəzalar arasında “Google”un “Chrome” veb brauzerinin satışı və “Android” sistemində öz axtarış mühərrikini üstün tutmasının qarşısını almaq üçün məhdudiyyətlər yer alır.
