“Türkmənistan” Hava Yolları Aşqabad-Moskva-Aşqabad marşrutu üzrə müntəzəm reyslərin 30 dekabrdan etibarən bir aylıq dayandırıldığını elan edib.
NOCOMMENT.az-ın xəbərinə görə, aviaşirkət qərarın səbəbləri ilə bağlı ətraflı açıqlama verməsə də, bu addım son hadisələr fonunda diqqət çəkir.
Rusiyanın beynəlxalq arenada artan təcridi, regionda yaşanan gərginliklər və xüsusilə Azərbaycan təyyarəsinin Qroznı üzərində vurulması ilə bağlı yaranan beynəlxalq narazılıq fonunda bu qərar bir çox spekulyasiyalara yol açır. Bəzi müşahidəçilər hesab edir ki, Rusiyaya uçmaq artıq təhlükəsiz hesab olunmur və bu səbəbdən Türkmənistanın qərarı həm siyasi, həm də təhlükəsizlik amilləri ilə bağlı ola bilər.
Son dövrlərdə region ölkələri arasında Rusiyaya qarşı narazılığın artması müşahidə olunur. Azərbaycan ictimaiyyəti və beynəlxalq ekspertlər Rusiyanın Azərbaycan təyyarəsinin vurulması ilə bağlı məsuliyyət götürməməsini tənqid edir. Bu vəziyyət ümumilikdə Rusiyaya qarşı inamsızlığın artmasına səbəb olub.
Türkmənistanın qərarı, bir çoxlarının fikrincə, bu gərginliyin birbaşa göstəricisidir. Görünür, artıq heç kim Rusiyaya getmək istəmir və bu tendensiya Rusiya ilə əlaqələrin gələcəkdə daha da zəifləyəcəyinə işarədir.\\Musavat.com
