Astara Rayon Məhkəməsində dövlət sərhədini qanunsuz olaraq keçməkdə təqsirləndirilən Əfqanıstan vətəndaşı M.M.-in (şərti) cinayət işi üzrə məhkəmə istintaqı yekunlaşıb.
NOCOMMENT.az-ın əldə etdiyi məlumata görə, hakim İlqar Məmmədovun sədrliyi ilə keçirilən prosesdə hökm oxunub.
Məhkəmənin hökmü ilə o, 9 ay müddətinə azadlıqdan məhrumetmə cəzasına məhkum olunub. Hökmdə qeyd edilib ki, təqsirləndirilən şəxs əsas cəzasını çəkdikdən sonra Azərbaycanın hüdudlarından kənara məcburi çıxarılsın.
İttihama görə, Əfqanıstan vətəndaşı M.M. Azərbaycan Respublikasının mühafizə olunan dövlət sərhədinin nəzarət-buraxılış məntəqələrində tətbiq edilən məhdudiyyətlərlə bağlı həmin məntəqələrdən piyada keçid zolağı ilə keçə bilmədiyindən, yaşamaq və işləmək üçün Azərbaycana gəlmək istəyib. O, bu məqsədilə 25 avqust 2024-cü il tarixdə, saat 21 radələrində ölkəmizin mühafizə olunan dövlət sərhədini dövlət sərhədinin nəzarət-buraxılış məntəqələrindən kənarda, yəni Xəzər dənizinin Azərbaycan Dövlət Sərhəd Xidməti Sahil Mühafizəsi Astara sahil nəzarəti şöbəsinin Astara sahil nəzarəti bölməsinin Astara rayonu ərazisində yerləşən xidməti ərazisində, sahil nəzarəti bölməsindən dənizdə üzərək, qəsdən, qanunsuz olaraq İran İslam Respublikasından Azərbaycan istiqamətində keçib. 25 avqust 2024-cü il tarixdə, saat 21:30 radələrində Astara sahil nəzarət şöbəsinin hərbi qulluqçuları tərəfindən Astara rayonunda yerləşən “Yelkən” istirahət mərkəzinin ərazisində saxlanılıb.
Əcnəbinin barəsində Cinayət Məcəlləsinin 318.1-ci (Azərbaycan Respublikasının dövlət sərhədini qanunsuz olaraq keçmə) maddəsi ilə ittiham irəli sürülüb.\\Pravda.az
