ABŞ Prezidenti Donald Tramp bazar ertəsi günorta saatlarında Kanada Baş naziri Castin Trüdo ilə görüşüb ilkin razılaşmaya gəldikdən sonra Kanadaya tətbiq edilən gömrük rüsumlarını dayandırıb.
“Təklif olunan rüsumlar azı 30 gün müddətinə dayandırılacaq, bu müddətdə birlikdə işləyəcəyik”
NOCOMMENT.az xəbər verir ki, bunu Kanadanın Baş naziri Trüdo bildirib. Tramp daha sonra bu məlumatı təsdiqləyib.
Xatırladaq ki, həftəsonu Tramp Kanada və Meksikaya 25%, Çinə isə 10% gömrük rüsumu tətbiq etdiyini açıqlamışdı. Kanada neftinə isə daha aşağı – 10% tarif müəyyən edilmişdi.
Dünən Tramp Meksika ilə də 30 günlük fasilə elan edib. Buna səbəb Meksikanın Trampın cənub sərhədində daha çox hərbçi yerləşdirmək tələbi ilə razılaşması olub.
Trüdo bildirib ki, Kanada ABŞ-Kanada sərhədini qorumaq üçün 10 min sərhəd işçisi cəlb edəcək. Bundan əlavə, ölkə fentanil üzrə xüsusi nümayəndə təyin etmək öhdəliyini də götürüb.
Ümumilikdə, Kanada 1,3 milyard dollarlıq sərhəd təhlükəsizliyi planını həyata keçirir.
“Prezident Tramp ilə yaxşı bir danışığımız oldu. Kanada sərhəd təhlükəsizliyini gücləndirmək üçün 1,3 milyard dollarlıq planı icra edir – yeni helikopterlər, texnologiyalar və sərhəd işçiləri ilə sərhədimizi möhkəmləndiririk, amerikalı tərəfdaşlarımızla koordinasiyanı artırır və fentanil axınının qarşısını almaq üçün əlavə resurslar ayırırıq”, – Trüdo “X” sosial şəbəkəsində yazıb. “Hazırda və gələcəkdə sərhəd təhlükəsizliyini təmin etmək üçün təxminən 10 min sərhəd işçisi fəaliyyət göstərəcək.”
“Kanada bizim Şimal sərhədimizin təhlükəsizliyini təmin etməyə və ölkəmizə axın edərək yüz minlərlə amerikalının həyatını məhv edən, ailələri və icmaları darmadağın edən ölümcül fentanil kimi narkotiklərin qarşısını almağa razılaşıb”, – Tramp bildirib. “Prezident olaraq mənim vəzifəm bütün amerikalıların təhlükəsizliyini təmin etməkdir və mən bunu edirəm. Bu ilkin nəticədən çox məmnunam və şənbə günü elan edilən rüsumlar Kanada ilə yekun iqtisadi razılaşma əldə olunub-olunmayacağını görmək üçün 30 günlük müddətə dayandırılacaq.”\\Valyuta.Az
