Ukrayna hakimiyyəti Ağ Evin hazırkı rəhbəri Donald Trampın seçkilərdə qalib gəlməsindən sonra ABŞ-ın 46-cı prezidenti Co Baydenin administrasiyası ilə anlaşma memorandumu imzalamaqdan imtina edib.
NOCOMMENT.az xəbər verir ki, bu barədə The New York Times (NYT) yazır.
Bu sənəd Kiyevdən Vaşinqtondakı hakimiyyət orqanlarına mineral ehtiyatlar sahəsində potensial layihələr haqqında vaxtında məlumat verəcəkdi. Bildirilir ki, Ukrayna bu sənədi ABŞ-la iki dəfə imzalamalı olub.
Lakin Ukrayna baş nazirinin müavini Yuliya Sviridenko təyin olunmuş günlərdə görüşlərə gəlməyib. Daha sonra rəsmi Kiyev bu müqaviləni o vaxta qədər artıq seçkilərdə qalib gəlmiş Trampla imzalamaq niyyətində olduğunu açıqlayıb.
Bundan əvvəl Ukrayna prezidenti Vladimir Zelenski bəyan etmişdi ki, Ukrayna və ABŞ arasında nadir torpaq metalları üzrə saziş investisiya fondunun yaradılması ilə bağlı sonrakı razılaşmadan fərqli olaraq ratifikasiya tələb etməyəcək. “Bu, çərçivə sazişidir, keçmişdən deyil, yeni şeylərdən bəhs edir. Bu gün siz investisiya fonduna pul yatıra bilməyəcəksiniz, çünki fondla bağlı növbəti razılaşma yoxdur, ortaq tərəfdaşlıq münasibətləri, pul olacaq”, – deyə dövlət başçısı bildirib.
