Bu gün ölkə ərazisində xeyli turizm şirkəti fəaliyyət göstərir. Lakin bəzilərinin işinə diqqət etsək, görərik ki, dələduzluq halları artıb. Bəzi şirkətlər saxta tur-paketlər təklif edərək, fürsətdən sui-istifadə edirlər. Dövlət Turizm Agentliyindən Ajans.az-a verilən məlumatda bildirilib ki, 2015-ci ildən turizm sektorunda sahibkarlıq fəaliyyəti üçün lisenziya tələbi və birbaşa nəzarət mexanizmi mövcud deyil.Lisenziyanın olmaması isə, nəticədə , hər bir şəxsin rahatlıqla bu işlə məşğul olmasına şərait yaradır. Nəticədə saxtakarlıq halları artır, vətəndaşlara xeyli maddi-mənəvi ziyan dəyir.
NOCOMMENT.az xəbər verir ki, mövzu ilə bağlı turizm məsələləri üzrə ekspert Rəhman Quliyev öz fikirlərini Ajans.az-a bildirib.
Rəhman Quliyev deyib ki, işsizliyin sayının azaldılması səbəbilə, bir çox sektorlarda lisenziyalarının ləğvi prosesi həyata keçirildi. Bu özünü turizm sahəsində də göstərdi. Əsas məqsəd sahibkarlara yeni imkanlar yaratmaq, iş yerlərinin sayını artırmaq idi. Təəssüf ki, turizm sektorunda sui-istifadə halları geniş yayıldı.
Turizm sahəsində dələduzluq etmək daha rahatdır. Çünki burada maddi məhsuldan söhbət getmir. Tərəflər arasında yalnız kağız alış-verişi əsas rol oynayır. Problem yarananda da maddi zərəri sübut etmək çətin olur.
Gün keçdikcə, bu sahədə özbaşınalıqlar daha da artır. Lisenziyanın bərpası mümkün olarsa, saxtakar tur-şirkətlərinin fəaliyyətinə son qoyula bilər.
Ekspert söyləyib ki, vətəndaşlar(turistlər) ilə turizm şirkətləri arasında artıq inam yoxdur. İnamı qaytarmaq üçün də dövlətin rəsmi icazəni yenidən bərpa etməsi vacibdir.
Bu gün Dövlət Turizm Agentliyi və Turizm-Agent işləri Assosasiyası bu sahədə müəyyən işlər görürlər. Müəyyən məhdudiyyətlər və nəzarət olsa da, müdaxilələrə yol verilmir. İstənilən vətəndaş adi VÖEN hesabı ilə bu sahədə fəaliyyət göstərə bilər. Həmçinin, dövlətə vergi ödəmir. Üstəlik, ya evindən, ya da qanunsuz məkandan bu işlə məşğul olur.
Rəhman Quliyev vətəndaşlara müraciət edib ki, növündən asılı olmayaraq, hansısa tur paketi alarkən məkanı dəqiqləşdirsinlər. Qanuni icazəsi olan yerlərdə fəaliyyət göstərən və işçilərinə bələd olunan şirkətlər daha güvənilir hesab edilir.
Vətəndaş aldığı biletdən başlayaraq, gedəcəyi ölkə, qalacağı otel, qidalanma, təklif olunan digər nüanslar haqqında ətraflı məlumat əldə etsinlər. Bütün məlumatları da rəsmi müqavilə ilə tələb etməkləri məqsədəuyğundur. Vətəndaş xidmətlər qarşılığında vəsaiti ödədikdən sonra qəbzi tələb etməlidir. Bu da gələcəkdə yarana biləcək hüquqi problemlərdə dəstək rolunu oynayır.
Bu məsələdə aidiyyəti üzrə digər qurumların da üzərinə böyük məsuliyyət düşür.
