ABŞ-ın hüquq-mühafizə orqanları Donald Trampa qarşı “Washington Hilton” otelində törədilən sui-qəsd cəhdi ilə bağlı araşdırmaları genişləndirərək, şübhəli şəxs qismində saxlanılan 31 yaşlı Koul Tomas Allenin Kaliforniya ştatının Torrans şəhərindəki mənzilində genişmiqyaslı əməliyyat keçirib.
NOCOMMENT.az xəbər verir ki, federal qüvvələr və FTB agentləri tərəfindən həyata keçirilən bu əməliyyat zamanı binanın ətrafı tamamilə mühasirəyə alınıb və cinayətkarın mümkün əlaqələrini, habelə hücumun gizli motivlərini üzə çıxarmaq üçün rəqəmsal məlumat daşıyıcıları, sənədlər və digər maddi sübutlar müsadirə edilib. Kaliforniya Texnologiya İnstitutunun (Caltech) məzunu olan və mühəndislik sahəsində təhsil alan Allenin yaşadığı ərazidə qonşuları onu qapalı və az danışan bir şəxs kimi xarakterizə etsə də, istintaq qrupu onun bu terror aktını planlaşdırarkən hər hansı bir qruplaşmadan dəstək alıb-almadığını dəqiqləşdirməyə çalışır.
İlkin məlumatlara görə, Allenə qarşı odlu silahdan zorakılıq məqsədilə istifadə və federal zabitə qarşı ölümcül silahla hücum maddələri üzrə ağır ittihamlar irəli sürülüb, lakin rəsmi Vaşinqton hələlik hadisəni “tənha canavar”ın fərdi hərəkəti kimi qiymətləndirməyə meyillidir.
Hazırda federal qüvvələrin evdə apardığı axtarışların nəticələri və ələ keçirilən sübutların istintaqın gedişatına necə təsir edəcəyi barədə geniş ictimaiyyətə detallı məlumat verilməsə də, bu hadisə ölkədə seçkiönü təhlükəsizlik tədbirlərinin ən yüksək səviyyəyə qaldırılmasına səbəb olub.
Sara,
NOCOMMENT.az
