Norveç hakimiyyəti 2026-cı ilin sonuna qədər parlamentə 16 yaşdan kiçik uşaqların sosial mediadan istifadəsini qadağan edən qanun layihəsi təqdim edəcək.
NOCOMMENT.az xəbər verir ki, bu barədə Norveç hökumətinin saytında məlumat verilib.
“Biz qanun layihəsini ilin sonuna qədər parlamentə təqdim etməyi planlaşdırırıq. Biz bu qanunu təqdim edirik, çünki istəyirik ki, uşaqlar uşaqlıqda uşaq olsunlar. Oyunlar, dostluqlar və gündəlik həyat alqoritmlər və ekranlarla əvəz olunmamalıdır. Bu, uşaqların rəqəmsal həyatını qorumaq üçün vacib bir tədbirdir”, – deyə Norveç baş naziri Yonas Qar Stör bildirib.
Hökumət hansı tətbiqlərin qadağan ediləcəyini dəqiqləşdirməyib. Təklif olunan yaş həddi uşağın 16 yaşı tamam olan ilin 1 yanvarında müəyyən ediləcək.
Texnologiya şirkətləri istifadəçilərin yaşını yoxlamaqdan məsul olacaqlar.
“Uşaqlar onlar üçün qadağan olunmuş platformalardan istifadə etmədiklərinə görə məsuliyyət daşıya bilməzlər. Bu məsuliyyət bu xidmətləri göstərən şirkətlərin üzərinə düşür”, – deyə Norveçin Rəqəmsal İşlər və Dövlət İdarəçiliyi naziri Karian Tung bildirib.
Norveç hakimiyyəti iki il əvvəl uşaqların sosial mediadan istifadəsini qadağan etmək planlarını açıqlamışdı. Əvvəlcə yaş həddi 15 olaraq müəyyən edilmişdi.
Qeyd edək ki, ilk dəfə Avstraliya 16 yaşdan kiçik uşaqların sosial mediaya çıxışına məhdudiyyətlər qoyub. Oxşar tədbirlər hazırda Böyük Britaniya, Fransa, İspaniya və Danimarka da daxil olmaqla bir sıra Avropa ölkələrində nəzərdən keçirilir. Türkiyə də sosial mediaya çıxışı tətbiq etməyi planlaşdırır; ölkə parlamenti 22 apreldə qanun layihəsini təsdiqləyib./Musavat.com/
