Ermənistan silahlı qüvvələrində müqavilə əsasında xidmət aparan onlarla hərbi qulluqçu ordudan ayrılır.
NOCOMMENT oxu.az-a istinadən xəbər verir ki, bu barədə “Joxovurd” qəzeti yazıb.
Nəşr qeyd edir ki, təkcə son günlərdə 50 hərbi qulluqçu işdən çıxmaq barədə ərizə yazıb.
Hərbi qulluqçuların ordu sıralarını tərk etmək istəməsinin səbəbi isə dözülməz şəraitdir. Hərbi qulluqçular bir çox hallarda yatmağa yerin olmadığını, qida məhsullarının çatışmazlığını, hətta bir sıra hallarda tualetlərin belə olmadığını bildiriblər.
Bütün bunlarla yanaşı Ermənistan ordusundan kütləvi ayrılmaların kökündə həm də maaş məsələsi göstərilir. Borc və kredit yükündən cana gələn hərbçilər aldıqları cüzi maaşla ailələrini belə saxlamaqda çətinlik çəkirlər.
Qəzet vurğulayır ki, ölkədə bu cür acınacaqlı mənzərənin fonunda siyasi dairələr ancaq vəd verməklə məşğuldurlar. Aclıq və səfalət içində yaşayan xalqın isə tək çarəsi olaraq ölkəni tərk etmək qalır. Bunu son illərdə Ermənistanın “boşalması” ilə bağlı xəbərlər də təsdiqləyir.
