Ağdamda əkin sahəsinə baxış zamanı daha bir qəbir aşkarlanıb.
NOCOMMENT.az apa-ya istinadən xəbər verir ki, rayonun Mirəşelli kəndində, kənd sakini Ceyhun Kərimovun əkin sahəsində traktorla şumlama işləri aparılarkən böyük daş parçası çıxıb və sahədə məzar olduğu məlum olub.
Ağdam rayonu İcra Hakimiyyəti başçısının Əhmədağalı kənd inzibati ərazi dairəsi üzrə nümayəndəsi Məhərrəm Quliyev APA-ya bildirib ki, hadisə yerinə cəlb olunan hüquq-mühafizə orqanlarının əməkdaşlarının apardığı araşdırmalar nəticəsində daha bir qəbirdə insan skeletinin qalıqları üzə çıxıb.
Hazırda ərazidə şumlama işləri dayandırılıb.
Qeyd edək ki, sözügedən ərazidə indiyədək qədim yaşayış məntəqəsinin olması barədə heç bir fakt qeydə alınmayıb.
Ehtimal olunur ki, aşkar olunan qəbir eramızdan əvvələ aid antik qəbirdir. Qəbrin uzunluğu 1.90 metr, eni 0.60 metrdir.
