Avropa İttifaqının (Aİ) monitorinq missiyası Ermənistan-Azərbaycan sərhədində kifayət qədər səmərəli işləyir.
NOCOMMENT modern-ə istinadən xəbər verir ki, bunu Ermənistan xarici işlər nazirinin müavini Paruyr Ovannisyan jurnalistlərə bildirib.
“Missiya fəaliyyətini davam etdirir, nümayəndələr vaxtaşırı olaraq Avropa İttifaqı üçün öz hesabatlarını hazırlayırlar”, – deyə o, hökumətin iclasından sonra bildirib.
Paruyr Ovannisyan Ermənistan XİN-də müşahidəçilərin hər hansı pozuntu qeydə alıb-almaması barədə məlumat olmadığını sözlərinə əlavə edib.
Xatırladaq ki, oktyabrın 17-də Aİ xarici işlər nazirləri Lüksemburqda keçirilən görüşdə Ermənistana 40 müşahidəçinin göndərilməsini rəsmən təsdiqləyiblər.
Müşahidəçilər Azərbaycanla sərhədə gələrək oktyabrın 20-də fəaliyyətə başlayıblar. Missiya iki ay üçün nəzərdə tutulub.