Fransa prezidenti Emmanuel Makronun Aİ qoşunlarının Ukraynaya göndərilməsinin mümkünlüyü ilə bağlı bəyanatı Avropadan kapital axınının artmasına səbəb ola bilər.
NOCOMMENT.az xəbər verir ki, bu barədə TASS-a müsahibəsində Brüsselin maliyyə dairələrindəki mənbə bildirib.
“Bu, Avropa iqtisadiyyatına uzunmüddətli investisiyalar üçün riskin artdığını göstərir”, – mənbə deyib.
Mənbənin sözlərinə görə, bu, Avropadan, ilk növbədə ABŞ-a kapital axınının daha da artmasına kömək edəcək.
Fevralın 26-da Makron Aİ ölkələrindən Ukraynaya qoşun göndərmə ehtimalını dilə gətirib. O bildirib ki, Parisdə keçirilən konfransda Aİ ölkələrinin quru qoşunlarının Ukraynaya göndərilməsi imkanları müzakirə olunub.
Daha sonra NATO-nun baş katibi Yens Stoltenberq bildirib ki, alyans öz əsgərlərini Ukraynadakı döyüş bölgəsinə göndərməyi planlaşdırmır.