Avropa Ukraynadakı münaqişənin həlli üçün danışıqlarda iştirak etməlidir, çünki Avropa ölkələri yeni təhlükəsizlik arxitekturasının qurulmasında əsas aktorlara çevrilməlidir.
NOCOMMENT.az xəbər verir ki, bu fikri Avropa Şurasının prezidenti Antonio Kosta deyib, onun sözlərini The Financial Times (FT) yazır.
“Əgər [ ABŞ Prezidenti Donald] Tramp həqiqətən də Avropanın öz müdafiəsi üçün daha çox məsuliyyət daşımasını istəyirsə, təbii ki, Avropa ölkələri regionda yeni təhlükəsizlik arxitekturasının inkişafında əsas oyunçulara çevrilməlidir. Və biz təkcə Ukraynadan danışmırıq”, – deyə siyasətçi qeyd edib.
FT daha əvvəl bildirmişdi ki, ABŞ və Rusiyanın Ukrayna üzrə danışıqlara hazırlaşması ilə bağlı məlumatdan ehtiyatlanan Avropa İttifaqı (Aİ) tələsik buna cavab verməyə çalışır. Sonradan məlum oldu ki, Fransa prezidenti Emmanuel Makron Ukrayna böhranının həlli üçün danışıqlarda mümkün iştirakı müzakirə etmək üçün Aİ liderlərini təcili toplantıya çağırıb.
