Əmlak bazarında ən ciddi problemlərdən biri də torpaq və ya evlərin birdən artıq şəxsə satılmasıdır.
Belə haldan əvvəlcədən xəbərdae olmaq mümkündürmü?
“İstər MTK mənzilləri, istərsə də fərdi torpaq sahələrinin alqı-satqısı mütləq şəkildə yalnız notarial qaydada və rəsmi çıxarış olduğu halda həyata keçirməlidirlər”.
NOCOMMENT.az xəbər verir ki, bunu “Yeni Sabah”a hüquqşünas Ramil Süleymanov bildirib.
O qeyd edib: “Rəsmi çıxarışı olmayan torpaq sahələri bəzən etibarnamə ilə, yaxud qeydiyyata salınma ilə satılır. Lakin bunların heç biri mülkiyyəti təsdiq edən sənəd deyil. Mülkiyyət hüququ yalnız Daşınmaz Əmlakın Dövlət Reyestri və Kadastrı publik hüquqi şəxsin verdiyi çıxarış əsasında rəsmiləşdirilə bilər. Yalnız bu halda torpaq sahələrinin alqı-satqısı mümkündür”.
R. Süleymanovun sözlərinə görə, əvvəlcədən belə halların baş verəcəyini bilmək çətin olur:
“Xüsusilə, yeni tikilən binalarda mənzil alan vətəndaşlar mütləq notarial qaydada alqı-satqı etməli və ya MTK-larla bağlanan daxili müqavilələrin “Asan İmza” vasitəsilə rəsmiləşdirilməsini tələb etməlidirlər. Bundan sonra binaya vahid çıxarış verildikdə, mənzillərin ayrıca alqı-satqısı mümkün olacaq.
Əgər belə hallarda bir mənzilin və ya torpaq sahəsinin iki və daha çox şəxsə satılması kimi vəziyyət ortaya çıxarsa, vətəndaşlar ilk növbədə hüquq-mühafizə orqanlarına – polisə və ya prokurorluğa müraciət etməlidirlər. Həmçinin, alqı-satqı müqavilələrinin və ümumiyyətlə, bu əməliyyatların qanunsuz hesab olunması ilə bağlı məhkəməyə müraciət etmələri tövsiyə olunur”.
