Türkiyə Xarici İşlər Nazirliyi Naxçıvan Muxtar Respublikasına pilotsuz uçuş aparatları ilə edilən hücumla bağlı rəsmi bəyanat yayıb.
NOCOMMENT.az xəbər verir ki, bəyanatda Ankara martın 5-də Naxçıvan ərazisinə qarşı həyata keçirilmiş pilotsuz uçuş aparatları ilə hücumları qətiyyətlə pislədiyini bildirib. Türkiyə tərəfi qeyd edib ki, bu cür hücumlar regionda gərginliyin daha da artmasına və münaqişənin genişlənməsi riskinin yüksəlməsinə səbəb olur.
Bəyanatda vurğulanıb ki, üçüncü ölkələrə qarşı yönəlmiş və müharibənin yayılmasına gətirib çıxara biləcək belə addımlar dərhal dayandırılmalıdır. Türkiyə Xarici İşlər Nazirliyi regionda sabitliyin qorunmasının vacibliyini qeyd edərək bütün tərəfləri məsuliyyətli davranmağa çağırıb.
Ankara eyni zamanda Türkiyənin hər zaman olduğu kimi bundan sonra da Azərbaycanın yanında olacağını xüsusi vurğulayıb. Türkiyə tərəfi iki ölkə arasındakı strateji müttəfiqliyin dəyişməz olduğunu və Azərbaycanın təhlükəsizliyi ilə bağlı məsələlərdə qardaş ölkəyə dəstəyin davam edəcəyini bəyan edib.
Türkiyənin bu açıqlaması regionda baş verən son hadisələr fonunda Azərbaycan-Türkiyə münasibətlərinin strateji əhəmiyyətini bir daha gündəmə gətirib. Analitiklər hesab edirlər ki, Ankara tərəfindən verilən bu mesaj həm siyasi, həm də diplomatik baxımdan mühüm əhəmiyyət daşıyır və regionda baş verən proseslərə Türkiyənin mövqeyini aydın şəkildə ortaya qoyur.
