ABŞ prezidenti Donald Tramp Qətər Baş naziri və xarici işlər naziri Şeyx Məhəmməd bin Əbdül Rəhman Əl Tani ilə çərşənbə günü Qəzza zolağında atəşkəs və radikal Fələstinin HƏMAS hərəkatı tərəfindən saxlanılan israilli girovların azad edilməsi üzrə danışıqların gedişini müzakirə etmək üçün görüşəcək.
NOCOMMENT.az bildirir ki, bu barədə Axios müxbiri Barak Ravid mənbəyə istinadən xəbər verir.
Bazar ertəsi səhər Tramp Qətər əmiri Şeyx Təmim bin Həməd Al Tani ilə telefon danışığı aparıb. Mənbənin məlumatına görə, Tramp və Qətərin baş naziri Tehranın nüvə proqramı üzrə yeni razılaşmanın əldə edilməsi üçün ABŞ və İran arasında birbaşa danışıqların bərpası imkanlarını da müzakirə edəcəklər.
Qətər İsraillə radikal Həmas hərəkatı arasında dialoqun əsas vasitəçilərindən biridir. İyulun 6-da tərəflər Qətər, Misir və ABŞ-ın vasitəçiliyi ilə Dohada Qəzza zolağında atəşkəs və anklavda saxlanılan israilli girovların azad edilməsinə dair razılaşma əldə etmək məqsədi daşıyan prosesi bərpa ediblər. Qətər Xarici İşlər Nazirliyinin nümayəndəsinin sözlərinə görə, məsləhətləşmələr hələ ilkin mərhələdədir və vasitəçilər dolayı danışıqların yeni mərhələsinə imkan verəcək çərçivə sazişi hazırlamaq üçün Həmas və İsraillə ayrıca qarşılıqlı fəaliyyət göstərirlər.
