“Kobud səslənməsin, bu qurum məni qətiyyən maraqlandırmır”.
NOCOMMENT.az xəbər verir ki, bunu qaynarinfo-ya açıqlamasında Azərbaycanın Əməkdar incəsənət xadimi, kinorejissor və kinoşünas Ayaz Salayev Azərbaycan Kinematoqrafçılar İttifaqının növbəti qurultayı ilə bağlı danışarkən deyib.
Ayaz Salayev ittifaqın qurultayında iştirak etməyəcəyini bildirib:
“Namizədliyimi də irəli sürmək fikrim yoxdur. İşlərim çoxdur, vaxtım da az qalıb. Yaşım da 60-ı keçib, yaradıcı planlarım var, onları başa çatdırmalıyam. İkinci səbəb də var, amma onu açıqlamaq istəməzdim. Amma bu səbəb daha önəmlidir. Mən bu barədə lap əvvəldən sözümü demişəm. Bu qurultayla bağlı heç nə danışmaq istəməzdim”.
Ayaz Salayev vaxtını yaradıcı işlərə sərf edəcəyini qeyd edib.
Qeyd edək ki, Azərbaycan Kinematoqrafçılar İttifaqının növbəti qurultayına hazırlıqlar gedir. Məlumata görə, Xalq artistləri Rasim Balayev və Şəfiqə Məmmədova namizədliyini bu qurultayda yenidən irəli sürüb və sədr postu uğrunda mübarizə aparacaqlar.
