““Azəriqaz” İstehsalat Birliyində hazırda əvvəlki komandadır. Bilirsiniz ki, rəhbərlik dəyişsə də, o qədər də dəyişiklik olmur. Hələ ki Azər Məmmədovun atdığı addımları uğurlu saya bilərəm. İl ərzində həddindən artıq insana qeyri-qanuni cərimələr yazılırdı. Dəfələrlə məhkəmə prosesində də cərimələrin qeyri-qanuni olduğunu təsdiq etmişik. Yaxud da qeydiyyatdan keçməyən abonent… İstehlakçıları, yəni abonentləri aldadırdılar. Artıq bu prosesi də müşahidə etmirik. Çox şadam”.
NOCOMMENT.az xəbər verir ki, bu sözləri Pravda.az-a açıqlamasında “Neftçilərin Hüquqlarının Müdafiə Təşkilatı” (NHMT) İctimai Birliyinin sədri, hüquq müdafiəçisi Mirvari Qəhrəmanlı deyib.
O, hazırda “Azəriqaz”dakı mövcud problemlərdən də danışıb: ““Azəriqaz” haqqında həmişə tənqidi rəylərim olduğu üçün deyəcəklər ki, yenə tənqid edir. Abonentlər də, işçilər də daim bizimlə əlaqədədirlər. Qurumun Təmir-Tikinti İdarəsində neqativ hallar, qanunazidd hərəkətlər görmüşük. İşçilərin ezamiyyətə göndərilmələri haqqında Nazirlər Kabinetinin müvafiq qanunları pozulur. Əmək Məcəlləsinin 169-cu maddəsinin pozulması da müşahidə olunur. Bu, şübhəli məqamdır. İşçiləri “boş dayanma” adı altında əməkhaqqının üçdə ikisi ödənməsi şərtilə məzuniyyətə göndərirlər. “Votsap” vasitəsilə göndərilən yazıları görmüşəm. İşçilərə təklif edirmişlər ki, ya məzuniyyətə getsinlər, ya da onlara boş dayanırmışlar kimi pul ödənəcək. Boş dayanma haqqında qanunu qeyri-qanuni tətbiq edirdilər. Qanun deyir ki, bu, qısa müddətdə olmalıdır. Şəkillərlə, faktlarla göstərmişik ki, əmək qanunvericiliyinə riayət olunmur. İşçilərin iş yerlərinin normal qaydada olmaması problemi də qalmaqdadır. Bu da Təmir Tikinti İdarəsinə aid idi. Eyni zamanda yenə də təqaüdçülərin işdən azad olunmaları davam edir. Qanuna görə, təqaüdçüləri Dövlət Neft Şirkətindən çıxarmağa ixtiyarları yoxdur. İşəgötürən tərəfindən əmək müqaviləsinə qeyri-qanuni əlavələr olunub. Yəni əmək müqaviləsinə məcburi bənd əlavə edilib. Bu məcburi bənddə işçinin adına yazılıb ki, təqaüd yaşına çatanda işdən azad olunum. Ümumilikdə, gedən proses isə müsbət gedişat ola bilər. Həftəlik mətbuatı başlarına yığırdılar, yaxud insanları rayonlarda ayaqüstə yığıb guya məlumat verirdilər. Bunu həmişə şou kimi dəyərləndirmişəm. Heç də ictimaiyyətlə işləmək adlandırıla bilməz. Düzgün deyil. Çox şadam ki, bunlar da yoxdur”.
