Qadın və kişi voleybolçular arasında Azərbaycan Yüksək Liqalarında təxirə salınan II turun oyunlarının keçirilmə yeri və vaxtı dəqiqləşib.
NOCOMMENT Report-a istinadən xəbər verir ki, Azərbaycan Voleybol Federasiyasından verilən məlumata görə, bu qarşılaşmalar yanvarın 22-nə təyin olunub.
Həmin gün ilk olaraq qadın voleybolçuların Yüksək Liqasında təxirə salınan “Murov” – UNEC matçı baş tutacaq. Görüş saat 16:00-da start götürəcək.
Ardından kişi voleybolçuların Yüksək Liqasında II turun təxirə salınan “Neftçi” – “Xarı bülbül” oyunu keçiriləcək. Bu qarşılaşma isə saat 18:00-da başlanacaq.
Hər iki görüş Voleybol Mərkəzində təşkil olunacaq.
Qeyd edək ki, bu oyunların yanvarın 12 və 13-də keçirilməsi nəzərdə tutulsa da UNEC və “Neftçi” klublarının bir çox voleybolçusunun qrip və yüksək hərarətdən əziyyət çəkməsi səbəbindən təxirə salınıb.
