Fevralın 16-da “Bakı Hərrac Mərkəzi” MMC-də ləğv prosesində olan “AG Bank” ASC-nin, fevralın 23-də isə “Dəmir Bank” və “Zamin Bank” ASC-lərin daşınmaz əmlaklarının satışı üzrə açıq hərraclar keçiriləcək.
NOCOMMENT xəbər verir ki, bu barədə bankların ləğvedicisi – Azərbaycan Əmanətlərin Sığortalanması Fondu (ADIF) məlumat yayıb.
Məlumata görə, söhbət “AG Bank”a məxsus, Bakı şəhəri, Binəqədi rayonu, Məhəmməd Əmin Rəsulzadə qəsəbəsi, Zahid Qəmbərov küçəsindəki 220,3 kv.m-lik və “Dəmir Bank”a məxsus Bakı şəhəri, Yasamal rayonu, Zahid Xəlilov küçəsindəki 91 kv.m-lik fərdi yaşayış evlərindən, “Zamin Bank”a məxsus Sumqayıt şəhəri, 17-ci məhəllədəki 220,5 kv.m-lik qeyri-yaşayış sahəsindən gedir. Əmlaklara müvafiq olaraq 210 min manat, 121 min manat və 320 min manat qiymət qoyulub.
