Bakıda avtomobil sürmə bacarıqlarını öyrənmək istəyən sürücülərin üzləşdiyi əsas problemlərdən biri şəhərdə kifayət qədər təlim meydançalarının olmamasıdır. Bu boşluq sürücülük məktəblərində təlimlərin təhlükəsiz şəraitdə keçirilməsinə ciddi maneə yaradır. Təlim meydançalarının çatışmazlığı nəticəsində, çoxsaylı sürücülük kursları iştirakçılarını birbaşa magistral yollara çıxarır.
Təlim prosesində bəzi hallarda sürücülərə minimal göstəriş verilərək, “bu qazdır, bu tormozdur” deyilib birbaşa yola buraxılır.
Bu, təcrübəsiz sürücülər üçün ciddi təhlükə doğurur. Nəticədə, magistral yollarda qəza şəraiti yaranır və bəzən faktiki qəzalar baş verir. Belə praktikalar həm sürücü namizədlərinin, həm də digər yol iştirakçılarının həyatını riskə atır.
Yol təhlükəsizliyi üzrə ekspert Rauf Ağamirzəyev məsələ ilə bağlı NOCOMMENT.az -a bildirib ki, Bakıda sürücülük təlimlərinin ən böyük problemi təhlükəsiz təcrübə meydançalarının olmamasıdır:
“Təlimçilər avtomobili birbaşa magistral yola çıxararaq təcrübəsiz sürücüləri riskə atır. Bu, təkcə sürücü namizədləri üçün deyil, şəhərdə hərəkətdə olan bütün iştirakçılar üçün təhlükə yaradır. Təhlükəsiz və sınaq şəraitində təlim meydançalarının yaradılması vacibdir, yalnız bu yolla qəza riskini minimuma endirmək mümkündür.”
Ekspertin sözlərinə görə, hazırkı sistem həm təlimçilərin peşəkarlıq səviyyəsi, həm də sürücü namizədlərinin real təcrübəsi baxımından ciddi çatışmazlıqlarla üzləşir:
“Təcrübəsiz şəxsləri birbaşa magistral yollara çıxarmaq böyük riskdir. Təlim prosesi mərhələli və planlı şəkildə qurulmalıdır. Sürücü əvvəlcə sadə hərəkətləri, dayanmaları və sürəti nəzarətdə saxlamağı öyrənməli, yalnız sonra real yola çıxmalıdır. Hazırda isə sürücülər təlimdə minimal göstərişlərlə yola buraxılır, bu da qəza riskini xeyli artırır”.
O həmçinin əlavə edib ki, təlimçilərin məsuliyyəti də kritikdir:
“Bir çox hallarda təlimçilər sürücüləri real təhlükə altında buraxaraq, yalnız əsas əmrlər – qaz və tormoz ilə kifayətlənirlər. Bu, yollarda qəza şəraitinin yaranmasına, bəzən isə faktiki qəzaların baş verməsinə səbəb olur. Təlimçilərin sertifikasiyası, peşəkarlıq səviyyəsinin ciddi yoxlanması və mərhələli təlim planının hazırlanması vacibdir. Bu problemlərin həlli üçün dövlət qurumları, yol polisi və sürücülük məktəbləri arasında sıx əməkdaşlıq olmalıdır.
Məqsəd sürücülük təlimlərini təhlükəsiz və səmərəli etməkdir. Bunun üçün təlim meydançaları yaradılmalı, praktiki dərslər yalnız orada başlamalı, sonra mərhələli şəkildə yola çıxış təmin olunmalıdır.
Əks halda, sürücülük təhsili ilə bağlı mövcud vəziyyət həm şəhər yollarında, həm də sürücü namizədlərinin həyatında ciddi risklər yaradır”.
Hazırkı vəziyyətin təhlükə yaratdığını vurğulayan ekspert deyir ki, Bakıda sürücülük təlimlərinin peşəkar standartlara uyğun olmaması, həm şəhər sakinlərini, həm də gələcək sürücüləri təhlükəyə atır:
“Təlim meydançalarının yaradılması, təlimçilərin peşəkarlıq səviyyəsinin artırılması və mərhələli təlim sisteminin tətbiqi şəhər yollarında qəza riskini minimuma endirə bilər. Bu, həm də yol hərəkəti mədəniyyətinin yüksəlməsinə xidmət edəcək”.
