Bakı şəhəri, Nizami rayonu ərazisində – Tofiq Abbasov küçəsi 40 və Rizvan Teymurov küçəsi 126a ünvanlarında yerləşən yeni tikili binanın sakinləri, görünür, küçəni özəlləşdirmək qərarına gəliblər. Belə ki, həmin binanın yaxınlığından keçən ümumi istifadə olunan alternativ yol üzərində özbaşına şlaqbaum quraşdırılıb.
NOCOMMENT.az xəbər verir ki, portalımıza müraciət edən sakinlərin sözlərinə görə, qeyd olunan ünvanda yaşayan bəzi şəxslər, ərazidən keçən və uzun müddətdir ictimai istifadə üçün açıq olan alternativ yolu bağlayaraq, avtomobillərin keçidini məhdudlaşdırıblar. Yol üzərində heç bir rəsmi qurumun icazəsi olmadan quraşdırılmış şlaqbaum digər ərazi sakinlərinin və nəqliyyat vasitələrinin sərbəst hərəkətinə ciddi şəkildə maneə yaradır.
“Bu yol uzun illərdir ki, burada yaşayan yüzlərlə insanın istifadəsindədir. İndi bir qrup bina sakini şəxsi maraqları naminə yolumuzu bağlayır. Bu, nə hüquqa, nə də mənəviyyata sığır,” – deyə ətraf küçədə yaşayan sakinlərdən biri bildirir.
Ən narahatedici məqam isə bu halın Fövqəladə Hallar Nazirliyi və digər təcili yardım xidmətləri üçün risk yaratmasıdır. Sakinlərin sözlərinə görə, hər hansı fövqəladə vəziyyətdə, yanğınsöndürən və ya təcili tibbi yardım maşınlarının bu əraziyə vaxtında çatması mümkünsüz ola bilər.
Hüquqşünaslar da bildirirlər ki, vətəndaşların ümumi istifadəsində olan yolların bağlanması yalnız aidiyyəti dövlət orqanlarının icazəsi ilə həyata keçirilə bilər. Əks halda, bu cür müdaxilələr qanun pozuntusu hesab olunur və inzibati məsuliyyətə səbəb ola bilər.
Qanun nə deyir?
Azərbaycan Respublikasının qanunvericiliyinə əsasən, ümumi istifadədə olan yolların, küçələrin və keçidlərin bağlanması yalnız müvafiq icra hakimiyyətləri və dövlət qurumlarının rəsmi razılığı ilə həyata keçirilə bilər. Əgər bu cür fiziki maneə (şlaqbaum və s.) şəxslər tərəfindən özbaşına qoyulubsa, bu qanunsuz tikili sayılır.
Mülki Məcəlləyə və “Yol hərəkəti haqqında” Qanuna görə:
Ümumi istifadədə olan yollar — vətəndaşların, fövqəladə xidmətlərin və ictimai nəqliyyatın sərbəst keçidinə açıq olmalıdır.
Özbaşına yol bağlama — digər şəxslərin sərbəst hərəkət hüququnun pozulması hesab olunur və bu, qanunvericiliyə ziddir.
Qanunsuz quraşdırılmış fiziki maneələr (şlaqbaum, hasar və s.) inzibati məsuliyyət doğura bilər.
Eyni zamanda, bu hal Fövqəladə Hallar Nazirliyi və təcili xidmətlərin operativ hərəkətinə təhlükə yaratdığı üçün əlavə hüquqi məsuliyyət də nəzərdə tutula bilər.
Məsələ ilə bağlı aidiyyəti qurumların – Nizami Rayon İcra Hakimiyyəti, Bakı Şəhər İcra Hakimiyyəti, Daxili İşlər Nazirliyi və FHN tərəfindən araşdırma aparılması və qanunsuz şəkildə qurulmuş şlaqbaumun aradan qaldırılması üçün tədbirlər görülməsi istənilir.
Bu məsələ yalnız bir binanın və ya bir küçənin problemi deyil – bu, şəhərsalmanın planlaşdırılmasında şəffaflığın, ictimai maraqların qorunmasının zəruriliyini bir daha ortaya qoyur.
Sonda sual açıq qalır: Bakıda küçələr kimindir? İctimaiyyətin, yoxsa ayrı-ayrı bina sakinlərinin?
