Baltikyanı ölkələr vahid sistemdən – Belarus, Rusiya, Estoniya, Latviya və Litvanın Elektrik Halqasından (EK BRELL) çıxdıqdan sonra Kalininqrad vilayətinin enerji sistemi şənbə günü, fevralın 8-də muxtar iş rejiminə keçib.
NOCOMMENT.az xəbər verir ki, bu barədə Rusiya Energetika Nazirliyinin Telegram kanalında məlumat verilib.
Qeyd olunur ki, Rusiyanın bu regionunun energetika sisteminin beş il ərzində muxtar rejimdə işləməsinin illik sınaqları onun baş verənlərə texniki hazırlığını təsdiqləyib. Bu gün Kalininqrad elektrik stansiyalarının ümumi gücü 1,88 giqavatdır. Energetika Nazirliyindən verilən məlumata görə, bu, regionun pik enerji istehlakından iki dəfə artıqdır və istənilən şəraitdə insanları enerji ilə təmin etməyə imkan verir.
Mənbə onu da bildirir ki, 2016-cı ildən 2020-ci ilə qədər Kalininqrad vilayətində dörd yeni elektrik enerjisi istehsalı obyekti tikilib: Mayakovskaya, Talaxovskaya, Preqolskaya və Primorskaya İES. Bundan başqa, mütəxəssislər şəbəkə infrastrukturunun tikintisi və yenidən qurulması üzrə irimiqyaslı layihə həyata keçiriblər.
Litva, Latviya və Estoniyanın BRELL enerji halqasından çıxmaq istəməsi ilə bağlı məlumatlar 2024-cü ilin iyulunda ortaya çıxdı. Litvanın Energetika Nazirliyi bəyan edib ki, Baltikyanı ölkələr 2025-ci ilin fevralında kontinental Avropa elektrik şəbəkələri ilə sinxronizasiyaya tam hazırdır.
