1988-ci ildə ölkəmizdəki ermənilər növbəti separatizm əməllərinə başlayanda yaranmış problemlərdən biri də azərbaycanlı kişilərin, o cümlədən də bəzi vəzifəli şəxslərin vaxtilə erməni qadınları ilə ailə qurması idi.
O zaman görkəmli şair Bəxtiyar Vahabzadənin qürur duyduğu məsələlərdən biri də Azərbaycan qızlarının davranışı idi.
“Qurban olum qızlarımızın qeyrətinə, evdə qarımağa üstünlük verirlər, amma yadlarla, xüsusilə də ermənilərlə ailə həyatı qurmurlar”, – deyə şair kövrələrək söyləmişdi.
Bəlkə də həmin dövrdə ermənilərlə münasibət quran tək-tük var idi, amma bu, qızlarımız arasında kütləvi hal almamışdı.
Əlbəttə, indi vəziyyət dəyişib: azərbaycanlı qızlar da azərbaycanlı oğlanlar kimi əcnəbilərlə ailə həyatı qururlar. Amma şairin dediyi kimi, bu siyahıda erməni milləti olmur.
Hətta xaricdə yaşayanlar arasında hansısa qız və ya oğlan erməni ilə ailə həyatı qurursa, bu, ölkəmizdə böyük hiddətlə qarşılanır. 2018-ci ildə Rusiyada yaşayan Azərbaycan Milli Mədəni Muxtariyyətinin Moskva regional bölməsinin sədri Ağadadaş Kərimovun qızının məsələsində olduğu kimi. Sonradan məlum oldu ki, diaspor rəhbərinin özünün arvadı da erməni millətindəndir və ad-soyadından başqa onda azərbaycanlılıqdan əsər-əlamət qalmayıb.
Vaşinqton görüşündən sonra Azərbaycanla Ermənistan münasibətlərinin normallaşmaya doğru irəliləməsindən sonra böyük qalibiyyət səbəbindən Qarabağ yükü çiyinlərindən qaldırılmış millətimiz sülh gözləntisinə görə özünü daha rahat hiss etməyə başladı. Millətimiz onu da başa düşür ki, siyasi rəhbərliyimizin sülhlə bağlı atdığı addımlar heç də bizim erməniləri bağrımıza basacağımız anlamına gəlmir. Çünki sovet dövründə guya bir ölkənin vətəndaşı kimi 70 il ərzində sülh içində yaşadığımız ermənilərin xalqımızın başına hansı oyunları gətirdiyini unutmaq mümkün deyil.
İndiki məqamda sülh təşəbbüsləri o deməkdir ki, hərə öz ölkəsində dinc şəkildə yaşayacaq, hansısa beynəlxalq tədbirlərdə tərəflər bir araya gələ biləcək, hətta Azərbaycanda və ya Ermənistanda keçirilən irimiqyaslı beynəlxalq tədbirlərdə hər iki millətin nümayəndələri təmsil oluna bilərlər.
Amma bu həftə baş verən Samirə Əfəndi olayı, ardınca da Xalq artisti, mərhum Ramiz Novruzun stilist-vizajist qızı Şəfəq Novruzun paylaşımı göstərir ki, bəzi azərbaycanlı qızlar bu rahatlığı tərsinə başa düşüblər və Mirzə Ələkbər Sabirin təbirincə desək, “sülh gəlməmiş çay keçməyə çırmanıblar”.
Odur ki, Samirə Əfəndinin “Tarixin Bir Günü” verilişinə çıxıb, Astanada keçirilmiş beynəlxaq musiqi yarışında erməniyə 12 bal verməsi və onu bağrına basması ilə əlaqədar özünə haqq qazandırması olduqca gülünc görünürdü. Əslində, Samirə Əfəndi açıqlamaları ilə özünü daha da dərinə batırdı.
O, bir tərəfdən qazi qızı və general nəvəsi kimi ölkə prezidentinin qurduğu sülh siyasətinin arxasınca getməyə çalışdığını və dövlət başçısına dəstək verdiyini iddia etdi, digər tərəfdən siyasətçi olmadığını, musiqiçi kimi müsabiqəyə yanaşdığını bildirdi. Bu məqamda sual yaranır: siyasətdən başı çıxmayan, ay müğənni, sülh siyasətinə niyə baş qoşmaq istəmisən, axı bu, sənin “xörəyin” deyil.
Digər tərəfdən, Samirə Əfəndi ona münsifliyin tapşırılmasının qorxulu olduğunu da nümayiş etdirdi.
“Finalda Azərbaycan iştirakçısı olmadığına, mənim üçün xalların və kimin qalib gələcəyinin önəmi qalmadığına görə bütün iştirakçılara, həmçinin də erməni iştirakçısına 12 xal vermişəm”, – deyə Samirə vurğuladı.
Onun bu ağlasığmaz etirafı göstərir ki, Samirə Əfəndi istedadlı müsabiqə iştirakçısının qalib gəlməsində maraqlı olmayıb. Sual yaranır: Belə qeyri-peşəkar düşüncədə olan adam hansı fikirlə beynəlxalq müsabiqəyə göndərilib?
Ən ağrılısı ondadır ki, erməni iştirakçının texnikasını, səsini tərifləyən Samirə Əfəndi hesab edir ki, Azərbaycan adından danışmağında qəbahət yoxdur və hərəkətinə görə peşman deyil.
“Siyasətçi deyiləm ki, düşmənçilik aparım orada, mən ora düşmənlik etməyə getməmişdim. Mən ölkəmi təmsil edirəmsə, ölkəmi nüfuzdan salmamalıyam, inancına zərər yetirməməliyəm”, – iddiasında olan müğənni dərk etmir ki, hərəkətləri ilə xalqımızın nüfuzuna da, inancına da, qeyrətinə də qara ləkə vurub.
Onun bu hərəkətini nə şəhid ailələri, nə də Xocalı soyqırımı və digər qırğınlar zamanı doğmalarını, əzizlərini itirmiş, dəhşətli işgəncələrə məruz qalmış, meyitləri təhqir olunmuş, qeyrətinə, namusuna toxunulmuş soydaşlarımız, Ermənistan əsirliyində izsiz-sədasız yoxa çıxarılmış azərbaycanlıların ailə üzvləri, nə də son 200 ildə dəfələrlə heysiyyatı ilə oynanılmış Azərbaycan xalqı heç bir vaxt bağışlaya bilər. Xalqımızın isə Samirə kimilərinin üzrünə ehtiyacı belə yoxdur. Şəhid ailələri isə bundan sonra bu cür düşüncədə olan adamın ianəsini qəbul etməməlidir. Müğənni indi həm də əməllərinə şəhid və qazi ailələrinə maddi dəstək göstərməsi ilə haqq qazandırmağa çalışır və bunu da (kiminsə göstərişi ilə) mediamız tirajlayır.
Halbuki, Samirənin imicini artıq həmin məlumatlar da düzəldə bilməyəcək. Xalqın yaddaşında o, həmişə 2019-cu ildə hərbi xidmətini Dağlıq Qarabağda keçmiş erməni ifaçıya 12 bal vermiş və onu bağrına basmış müğənni kimi qalacaq.
Samirənin ardınca Xalq artisti, mərhum aktyor Ramiz Novruzun stilist-vizajist qızı Şəfəq Novruz erməni həmkarı Georgi Kotla fotolarını paylaşmaqla meydana çıxdı.
Maraqlıdır ki, bunu da kino tariximizdə general Həzi Aslanovun (iddialara görə, erməni tərəfindən qətlə yetirilib – red.) obrazını canlandırmış aktyorumuzun övladı edib. Şəfəq Novruzun fotonun üzərində “Очень святой для меня человек, мой учитель, мой дорогой, второй по значимости человек после отца” (Mənim üçün çox müqəddəs insan, mənim müəllimim, əzizim, əhəmiyyətinə görə atamdan sonra ikinci insan) yazması ilk növbədə atasına, sonra isə ailəsində və nəslində olan kişilərə qarşı hörmətsizlik kimi qiymətləndirilə bilər.
Şəfəq Novruzdan fərqli olaraq, Georgi Kotun davranışının daha uyğun hesab olunduğu, daha sədaqətli davrandığı qeyd edilə bilər.
Erməni saytlarının yazdığına görə, o, Abxaziyanın Qaqra şəhərində yarı erməni (anası ermənidir) ailəsində doğulsa da, 5 yaşında öz xahişi ilə erməni ümumtəhsil məktəbinin birinci sinfinə oxumağa gedib.
“Anam ermənidir. Hətta atam da artıq ermənicə danışır, çünki anam çox güclü qadındır. Ailəmizdə erməni adət-ənənələri var və bütün toylarımızı ermənicə edəcəyik”, – deyən Kot soyadının “Kotyan”a dəyişdiriləcəyini də istisna etməyib.
Rusiyada yaşasa da, bütün çıxışlarında erməniləri vəsf edən Kot əmindir ki, ermənilər hər etdiklərini mükəmməl edir, çünki bu, onların qanında var.
“Ermənilər bununla doğulublar. Onlar yaxşı zərgərdirlər, yaxşı zövqə malikdirlər, dəbdəbəni, zənginliyi və gözəlliyi sevirlər. Ermənilər məşhur və zəngin olmağı sevirlər. Məni Ermənistanla nə bağlayır? Mən erməni musiqisini sevirəm; məni düşündürür. Ona görə yox ki, əzabdan və ya depressiyadan həzz alıram. Mən də depressiyaya düşürəm. Başqa yol yoxdur; düşünməsən və əziyyət çəkməsən, heç nə yarada bilməzsən. Amma erməni musiqisi ruhuma o qədər toxunur ki, özümü çox kiçik hiss edirəm. Mən Ermənistanı çox bəyənirəm. Bura gəldim və düşündüm: bu, doğrudan da Ermənistandır? Çox gözəldir! “Sevan” və “Ararat” deyəndə bu sözlərin nə qədər tarixə hopduğunu, nə qədər möhtəşəm olduğunu anlayırsan”, – deyə Şəfəqin atasından sonra ikinci adam saydığı Georgi etiraf edib.
Siz təsəvvür edirsinizmi, 2016-cı ildə Şəfəq Novruz təpədən dırnağadək erməni zehniyyətinə malik “ustadı”nı Bakıya səfərə dəvət etmişdi. O zaman aktyor Ramiz Novruz etiraf etmişdi ki, qızının bu istəyinə qarşı çıxıb (azərbaycan24). “Şəfəq onu Azərbaycana dəvət etmişdi. Lakin mən bu söhbəti eşidəndə Şəfəqə qarşı çıxdım, dedim ki, lazım deyil, qoy gəlməsin. Əgər Azərbaycan cəmiyyəti yarı bolqar, yarı erməni olan stilisti istəmirsə, biz də qəbul etmirik. Həmin söhbət də bununla bağlanıb”, – deyə xalq artisti özünə təsəlli vermişdi.
Atasının imicini yerlə-yeksan edən Şəfəq Novruz isə heç vecinə almadan Kotla daha səmimi fotosunu sosial şəbəkədə paylaşaraq belə şərh yazmışdı: “Sizi yaratdığı üçün Allaha şükür edirəm. Yaxşı ki, varsınız, Georgi Kot. Çox sağ olun ki, Allahın sizə verdiyi qeyri-adi istedadı və təcrübəni bizimlə də bölüşürsünüz. Sizə hər şeyə görə təşəkkür edirəm. Sizi çox sevirəm və hörmət edirəm, mənim qiymətli ustadım”.
Bu hadisə qanlı Aprel döyüşlərindən 3 ay sonra baş vermişdi. Dörd gün davam edən döyüşlər zamanı Şəfəq Novruz kimilərin rahat yaşaması naminə qəhrəman Azərbaycan oğulları canlarından keçmişdilər…
Yaxşı ki, müqtədir şairimiz Bəxtiyar Vahabzadə dünyasını dəyişib. Yoxsa belə hallara qarşı sərt etirazını bildirərdi.
Politoloq Eldar Namazov bu yaxınlarda “Yeni Azərbaycan TV”yə müsahibəsində Azərbaycan dövlətinə xəyanət edən Ramiz Mehdiyevi azərbaycanlı hesab etmədiyini söylədi. Nə qədər ağır olsa da, deməliyik ki, bu sözlər hərəkətləri ilə xalqımızı üzən Samirə Əfəndi və Şəfəq Novruza da aiddir.
Xatirə SADİQ
