Beynəlxalq Qırmızı Xaç Komitəsi açıqlama yayıb.
NOCOMMENT xəbər verir ki, məlumatda deyilir:
Cenevrə (BQXK) – Beynəlxalq Qırmızı Xaç Komitəsi (BQXK) gərginləşən Dağlıq Qarabağ münaqişəsi üzrə humanitar atəşkəslə bağlı razılıq əldə olunmasını təqdir edir və neytral vasitəçi qismində, hərbi əməliyyatlar zamanı həlak olmuş şəxslərin cənazələrinin qaytarılması və saxlanılan şəxslərin eyni zamanda azad edilməsi proseslərini təşkil etməyə hazırdır.
BQXK-nın dünyada baş verən münaqişələrdə uzun müddətə dayanan neytral vasitəçilik tarixi var və biz ümid edirik ki, bu proses də qısa müddət ərzində həyata keçirilə bilər və əməliyyatlar zamanı həlak olan şəxslərin cənazələri onların ailələrinə verilərək layiqli şəkildə dəfn edilər,” deyə BQXK-nın Cenevrədə Avrasiya üzrə Regional Direktoru Martin Şüepp məlumat vermişdir. “Biz həmçinin, saxlanılan şəxslərin ailələrinə qovuşması üçün azad edilərək münaqişə tərəflərinə geri qaytarılması əməliyyatında yardımçı olmağa hazırıq.
Sentyabr ayının sonlarında münaqişə alovlandığı zaman BQXK, humanitar ehtiyacları qarşılamaq və tərəflər arasında neytral vasitəçi qismində çıxış etmək üçün öz xidmətlərini təklif etmişdir. BQXK, siyasi danışıqlara qatılmır.
Silahlı münaqişələri tənzimləyən beynəlxalq humanitar hüquqa əsasən, münaqişə tərəfləri, hansı tərəfdə vuruşmasından asılı olmayaraq, bütün həlak olanları toplamaq və cənazələrini təxliyə etmək öhdəliyi daşıyır. BQXK tərəflərə həlak olanların beynəlxalq humanitar hüquqa uyğun olaraq kimliyinin müəyyən edilməsi ilə bağlı texniki tövsiyyələr verməyə, sonra isə cənazələrin qaytarılması prosesinə dəstək verməyə hazırdır.
“Biz, tərəflərə müraciət edərək saxlanılan şəxslərin və həlak olanların qaytarılması, eləcə də təşkilati məsələlər və cəlb olunacaq əməkdaşlarımız üçün təhlükəsizlik zəmanətləri də daxil olmaqla BQXK-nın prosesə nə dərəcədə cəlb olacağını müzakirə etməyə hazır olduğumuzu bildirmişik,” deyə Şüep məlumat verdi. “Ümid edirik ki, bu razılaşma həftələr sürən ağır döyüşlərdən sonra ailələrin rahatlıq tapmasına səbəb olacaq.”
2016-cı ilin aprelində bu münəqişə təmas xətti boyunca alovlandığı zaman da BQXK tərəflərə oxşar əməliyyatların həyata keçirilməsində dəstək göstərmişdi. Həmin vaxt əlaqələndirmənin yaxşı təşkil edilməsi üçün birgə göstərilən səylər nəticəsində bütün həlak olan şəxslərin cənazələri ailələrinə verimiş və bununla da, 1992-ci ildə münaqişənin başladığı tarixdən bu yana 4500-dən çox insanı əhatə edən itkin düşmüş şəxslər siyahısına yeni adların əlavə olunmamasına nail olunmuşdur. BQXK Dağlıq Qarabağ münaqişəsi ilə əlaqədar 1992-ci ildən bəri bu tipli əməliyyatlarda hakimiyyət orqanlarına dəfələrlə yardım etmişdir.
