Abşeron Rayon Məhkəməsində yol qəzası törətməkdə təqsirləndirilən Alim Əsədovun (ad, soyadı şərti) cinayət işi üzrə məhkəmə istintaqı yekunlaşıb.
NOCOMMENT.az-ın əldə etdiyi məlumata görə, hakim Cəmilə Səfiyevanın sədrliyi ilə keçirilən prosesdə hökm oxunub.
Məhkəmənin hökmü ilə o, cəzasını məntəqə tipli cəzaçəkmə müəssisəsində çəkməklə 2 il 6 ay müddətinə azadlıqdan məhrum edilib.
İttihama görə, 1985-ci il təvəllüdlü Alim Əsədov DİN-nin BDYPİ-nə bilavasitə tabe olan YPXA-nın 11-ci taqımının operatoru vəzifəsində çalışıb. Polis serjantı rütbəsində xidmət etmiş təqsirləndirilən şəxs 19 yanvar 2024-cü il tarixdə, saat 14 radələrində ona təhkim olunmuş “BMW” markalı avtomobilini özü idarə etməklə Abşeron rayonu, Novxanı kəndi, Novxanı-Masazır yolu ilə Binəqədi rayonu istiqamətində hərəkətdə olub. Bu zaman Alim Əsədovun mobil telefonuna zəng gəlib və o, diqqəti yayınaraq idarəetməni itirib. Sonra ehtiyatsızlıqdan həmin yol üzərində yerləşən “Rahat” marketin yaxınlığında nizamlanmayan piyada keçidindən yolu sağdan sola keçən piyada Mahir Qayıbovu (ad, soyadı şərti) avtomobilə vurub. Ağır bədən xəsarətləri alan yaralı vəfat edib.
İstintaq dövründə onun başqa yerə getməmək haqqında iltizam qətimkan tədbiri seçilmişdir.
Zərərçəkmiş şəxsin hüquqi varisi məhkəmə ifadəsində bildirib ki, atası Mahir Qayıbov 3-cü qrup əlil olmuş və Sumqayıt şəhərində yerləşən Əmanətlərin Sığortalanması Fonduna aid sahədə bağban işləmişdir. Qeyd edib ki, təqsirləndirilən şəxs özü yas mərasiminə gəlməmiş, lakin onun ailə üzvləri hadisə günü, dəfn günü, üçü və yeddisi günləri yas mərasimində iştirak etmiş, hətta maddi dəstək olmağa çalışsalar da, onların köməyindən imtina etmişdir.
