Rusiyada akkreditasiyadan məhrum edilən 6 britaniyalı diplomat ölkəni çoxdan tərk edib.
NOCOMMENT.az xəbər verir ki, bu barədə RTVI-nın sorğusuna cavab olaraq Böyük Britaniyanın Moskvadakı səfirliyindən məlumat verilib.
“Bu və digər Britaniya diplomatlarına qarşı ittihamlar açıq-aşkar gülüncdür və Rusiyanın Böyük Britaniyanı gözdən salmaq üçün apardığı geniş kampaniyanın bir hissəsidir”, – səfirlik bildirib.
Britaniya diplomatik missiyası aydınlaşdırıb ki, Rusiyanın iddia edilən diskreditasiyası Ukrayna münaqişəsi ilə bağlı davam edən gərginlik və bir sıra digər problemlər fonunda dayanır.
Bundan əvvəl Rusiya Federasiyasının Federal Təhlükəsizlik Xidməti məlumat vermişdi ki, daxil olan sənədlər əsasında Böyük Britaniyanın Rusiyadakı səfirliyinin altı əməkdaşının akkreditasiyasının ləğvi barədə qərar qəbul edilib. Buna səbəb diplomatların “kəşfiyyat və təxribat işlərinin əlamətlərinin aşkarlandığı” hərəkətləri olub.
