Ermənistan müxalifətinin sərhəd bəyanatı keçmədibackend

Ermənistan müxalifətinin sərhəd bəyanatı keçmədi

  • whatsapp
  • messenger
  • telegram
  • vkontakte
  • odnoklassniki

Ermənistan Milli Məclisinin xarici əlaqələr komissiyası müxalif Ermənistan fraksiyasından lideri, keçmiş müdafiə naziri Seyran Ohanyanın hazırladığı bəyanat layihəsini 6 əleyhinə, 4 leyhinə səs nisbəti ilə rədd edib.

NOCOMMENT yenisabah-a istinadən xəbər verir ki, keçmiş prezident Robert Köçəryanın yaratdığı fraksiyadan verilən bu layihə Azərbaycanla sərhədin delimitasiya və demarkasiyası barədə idi. Xəbərdə deyilir ki, komissiya iclasının əvvəlində məsələnin həssaslığı nəzərə alınaraq səs çoxluğu ilə müzakirənin qapalı keçirilməsi barədə qərar qəbul olunub.

Xarici əlaqələr komissiyasının sədri Eduard Ağacanyan bu barədə deyib: “Təklif olunan bəyanat layihəsinin öz məzmunu etibarilə əsasən daxili siyasi xarakteri daşıması, sənəddə hökumətin birbaşa və dolayısı ilə ittiham olunması və onun faktiki olaraq müxalifətin hazırkı siyasi narazılığını əks etdirməsi artıq əsas verir ki, Vətəndaş müqaviləsi partiyasının komissiyadakı üzvləri onun əleyhinə səs versinlər. Eyni zamanda layihənin açıq müzakirəsinin danışıqlara mane ola biləcəyi, habelə təhlükəsizliyə problemlər yaradacağı nəzərə alınaraq bu məsələnin qapalı rejimdə müzakirəsi təklif edilir”.

Azatutyun yazır ki, müxalif Hayastan fraksiyasından deputat Armen Rustamyan müzakirənin qapalı keçirilməsinin qeyri-məqbul olduğunu bildirib. O deyib ki, bəhanə gətirilir, əsas məqsəd isə hakimiyyətin ağrılı və həyəcan doğuran razılaşmalara getməsidir.

Deputat soruşub ki, bu layihənin hansı bəndinə görə onun əleyhinə səs verilib: “Əgər qısa əsaslandırsaq, məsələnin mahiyyəti belədir: biz demişik ki, suverenliyimizdən heç bir güzəşt edilməməlidir və Konstitusiya rəhbər tutulmalıdır. Suverenlik həm də həmin dəhliz məntiqi və Ermənistanın mümkün itkiləri ilə bağlıdır. İkincisi, elə addımlar atmaq olmaz ki, Artsax (Qarabağ) Azərbaycanın tərkibində qalsın. Bu, ermənilərin Artsaxdan (Qarabağ-red) qovulması demək olacaq. Üçüncü məsələ isə ön cəbhəni, mövqelərimizi möhkəmlətməklə bağlıdır. Çünki biz öz sərhədlərimizi qorumasaq, kənardan heç kəs gəlib bunu bizim əvəzimizə etməyəcvək. Yəni onlar bunun əleyhinədirlər? Qoy indi izah etsinlər ki, niyə bunların əleyhinədirlər?..”

Lakin komissiya sədri Eduard Ağacanyan deyib ki, onun partiyasının bu layihəyə qarşı çıxmasının bir səbəbi onun siyasi məzmunudur. Onun sözlərinə görə, iclasın qapalı keçirilməsi barədə qərar isə müzakirə olunan məsələlərin həssaslığın ilə bağlıdır.

Noyabrın 26-da Soçidə keçirilən üçtərəfli görüşdən sonra verilən bəyanatda deyilirdi ki, Bakı və Yerevan sərhədin delimitasiya və demarkasiyası üçün birgə komissya yaratmalıdırlar.

Lakin Ağacanyan deyib ki, bu məsələ ilə bağlı heç bir təzə xəbər yoxdur.

Azatutyun yazır ki, Azərbaycan, Rusiya və Ermənistan liderlərinin Soçi müzakirələrinin təfərrüatları barədə də heç bir məlumat verilməyib.

Bu görüşdən sonra Moskvada baş nazir müavinlərinin müzakirələri keçirilmişdi. Ermənistan Təhlükəsizlik Şurasının katibi Armen Qriqoryan demişdi ki, bu iclasda razılaşma əldə oluna bilməyib. Baş nazir müavinlərinin yaxın gələcəkdə bir daha görüşəcəyi xəbər verilib.