Ermənistan parlamentində çoxluqda olan “Vətəndaş müqaviləsi” fraksiyası Baş nazir səlahiyyətlərinin icra edən Nikol Paşinyanın namizədliyini bu posta irəli sürüb.
NOCOMMENT Sputnik Armenia-ya istinadən xəbər verir ki, bu barədə fraksiyanın katibi Nazeli Baqdasaryan feysbuk səhifəsində yazıb.
Ermənistan Konstitusiyasına əsasən, ölkə prezidenti yeni parlament səlahiyyətlərinin icrasına başlayandan dərhal sonra Baş nazir postuna çoxluğun nümayəndəsini təyin edir. Nazirlər Kabineti isə Baş nazir təyinatından sonra 15 gün ərzində formalaşır. Hökumət başçısı 20 gün ərzində parlamentə Nazirlər Kabinetinin proqramını təqdim etməlidir.
Qeyd edək ki, bu il iyunun 20-də Ermənistanda növbədənkənar parlament seçkiləri keçirilib. Seçkilərdə Ermənistanın Baş naziri səlahiyyətlərini icra edən Nikol Paşinyanın Vətəndaş Müqaviləsi Partiyası (71 deputat) qalib gəlib. Keçmiş prezident Robert Köçəryanın “Ermənistan” bloku 29 deputat, sabiq dövlət başçısı Serj Sarkisyan və Milli Təhlükəsizlik Xidmətinin keçmiş direktoru Artur Vanetsyanın “Şərəfim var” bloku 7 deputatla parlamentdə təmsil olunurlar./report
