Estoniya Xarici İşlər Naziri Marqus Tsaxn xəbərdarlıq edib ki, əgər Macarıstan Baş naziri Viktor Orban Avropa İttifaqının Rusiyaya qarşı sanksiyalarının uzadılmasını bloklasa, bu, dondurulmuş Rusiya aktivlərinin Vladimir Putinə qaytarılmasına səbəb ola bilər.
NOCOMMENT.az apa-ya istinadən xəbər verir ki, o bunları Financial Times-ə müsahibəsində deyib.
Tsaxna qeyd edib ki, Avropa İttifaqı hər altı ayda bir sanksiyaların uzadılması üçün yekdilliklə qərar qəbul etməlidir və Macarıstanın razılığı olmadan bu mümkün deyil. Əgər sanksiyalar uzadılmasa, təxminən 240 milyard avro dəyərində dondurulmuş Rusiya aktivləri Putinə qaytarıla bilər.
Estoniya naziri bu vəziyyəti Avropa vergi ödəyiciləri üçün maliyyə yükü kimi qiymətləndirib və bildirib ki, bu, Avropa İttifaqının təhlükəsizliyinə təhdid yaradır. O, həmçinin, Macarıstanın Aİ-dəki səsvermə hüququnun dayandırılmasını təklif edib, çünki Orbanın hərəkətləri Aİ-nin birliyini və təhlükəsizliyini sarsıdır.
Tsaxna əlavə edib ki, Rusiya aktivlərinin müsadirəsi və Ukraynaya yönləndirilməsi üçün hüquqi əsaslar mövcuddur və bu, beynəlxalq hüquqa uyğun olaraq həyata keçirilə bilər.
Bu çağırışlar, Aİ-nin Rusiya ilə bağlı siyasətində birliyin qorunması və Ukraynaya dəstəyin artırılması məqsədi daşıyır.
