“FAB Boya və Kimya Sənayesi” MMC gömrük qaydaları əleyhinə olan inzibati xətaya görə cərimələnib.
NOCOMMENT.az-ın əldə etdiyi məlumata görə, Dövlət Gömrük Komitəsi tərəfindən şirkət barəsində İnzibati Xətalar Məcəlləsinin 485.2-ci (Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə) maddəsinə əsasən cərimə protokolu tərtib edilib.
Daha sonra protokol baxılması üçün Binəqədi Rayon Məhkəməsinə göndərilib. Məhkəmədə barəsində protokol tətbiq edilmiş MMC ilə bağlı müraciətə baxılıb.
Hakim Aygün Qurbanovanın sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib.
Xatırladaq ki, gömrük qaydaları əleyhinə olan inzibati xətaya görə vəzifəli şəxslər 1000 manat məbləğində, hüquqi şəxslər 1500 manat məbləğində cərimə edilir.
Qeyd edək ki, “Fab Boya və Kimya Sənayesi” MMC 20 aprel 2004-cü il tarixində dövlət qeydiyyatına alınıb. Şirkətin qanuni təmsilçisi Məhərrəmov Kənan Məhərrəm oğludur. Şirkətin təsisiçisinin isə Anar Səfər oğlu Əliyev olduğu bildirilir. Anar Əliyev eyni zamanda “OMİD” mağazalar şəbəkəsinin sahibidir.
