Türkiyə Cümhuriyyətinin qurucusu və ilk Prezidenti Mustafa Kamal Atatürkün Fransadakı yeganə büstü Parisətrafı məhəllələrin birində naməlum şəxslər tərəfindən oğurlanıb.
NOCOMMENT.az AZƏRTAC-a istinadla xəbər verir ki, bu barədə “CNN Türk” telekanalı məlumat yayıb.
Məlumata görə, Trabzon Mühacirlər Cəmiyyətinin təşəbbüsü ilə 3,5 ay əvvəl qoyulan büst Epinay-sur-Seine kommunasında naməlum şəxslər tərəfindən oğurlanıb.
Cəmiyyətin rəhbəri Bülent Cumhur bildirib ki, müşahidə kameraları cinayət əməlinin yeddi iştirakçısını qeydə alıb.
“Bu çirkin cinayəti qətiyyətlə pisləyirik. Təxribatın arxasında konkret kimin olduğu məlum deyil. Bütün iştirakçılar cəmi 4 dəqiqə ərzində hadisə yerindən qaçıblar. Polis araşdırmalarını davam etdirir”, – deyə o qeyd edib.
Cumur oğurlanan büstün yerinə tezliklə yenisinin qoyulacağına söz verib.
Bu arada, Türkiyənin Mersin şəhərinin Yenişehir rayon bələdiyyəsinin başçısı Abdulla Özyiğit yeni büstün Fransaya göndərilməsi üçün göstəriş verildiyini açıqlayıb.
