Polşa hakimiyyəti Belarus və Ukrayna kimi üçüncü ölkələrin hava məkanında pilotsuz təyyarələrin və raketlərin vurulmasını qanunla müəyyən etməyi planlaşdırır.
NOCOMMENT.az bildirir ki, bu barədə Gazeta Wyborcza xəbər verir.
Nəşrin yazdığına görə, Polşa hərbçiləri “Hüquq və Ədalət” partiyasının yaratdığı hökumətin təşəbbüsü ilə 2022-ci ilin fevralında Polşa silahlı qüvvələrinin xaricdə istifadəsi ilə bağlı qanuna edilən dəyişikliklərdən sonra qonşu dövlətlər üzərində səmadakı obyektləri vurmaq qabiliyyətini itirib. Sənədə əsasən, Polşa silahlı qüvvələrinin xaricdə istifadəsi “Polşa Respublikasının üzv olduğu beynəlxalq təşkilatın səlahiyyətli orqanının” (məsələn, NATO), Avropa İttifaqının orqanının qərarı əsasında və ya qəbul edən dövlətin dəvəti və ya razılığı ilə baş verə bilər.
Bununla əlaqədar, 2024-cü ilin iyununda Polşa Müdafiə Nazirliyi yeni qanun layihəsi hazırladı, ona əsasən, Polşa hakimiyyət orqanlarına “BMT Nizamnaməsinin 51-ci maddəsində qeyd olunduğu kimi, özünümüdafiəyə xas hüquq əsasında” xaricdə silahlı qüvvələrdən istifadə etmək səlahiyyəti veriləcək. Qeyd olunur ki, layihə əlavə təsdiq edilmədən də tez bir zamanda qəbul edilə bilər.
Kiyev hakimiyyəti dəfələrlə Varşavadan və digər Qərb tərəfdaşlarından Ukrayna səmasında Rusiyanın pilotsuz təyyarələrini və raketlərini vurmağı xahiş edib. Polşa səlahiyyətliləri, öz növbəsində, bu cür hərəkətlərlə bağlı riskləri qeyd edir və onların yalnız bütün NATO ölkələrinin razılığı ilə həyata keçirilə biləcəyini vurğulayırlar.
