Hüquq-mühafizə orqanları noyabrın 28-dən Gürcüstanda etiraz aksiyalarında iştirak edən 400-dən çox etirazçını saxlayıb.
NOCOMMENT.az xəbər verir ki, bu barədə Gürcüstan Daxili İşlər Nazirliyinin mətbuat xidmətindən məlumat verilib.
“Noyabrın 28-dən davam edən etiraz aksiyaları çərçivəsində 30-dan çox şəxs müəyyən edilərək məsuliyyətə cəlb edilib. Bundan başqa, 372 nəfər inzibati qaydada saxlanılıb və barələrində iş başlanılıb. Onlardan 62 nəfərə artıq inzibati həbs tətbiq edilib. 100-dən çox şəxs isə cərimə olunub”, – məlumatda deyilir.
Daxili İşlər Nazirliyi əlavə edib ki, aksiyalar zamanı 150-dən çox polis əməkdaşı xəsarət alıb.
Qeyd edək ki, noyabrın 28-də hakimiyyət ölkənin 2028-ci ilə qədər Avropa İttifaqına daxil olması ilə bağlı danışıqların dayandırıldığını elan etdikdən sonra Tbilisidə və Gürcüstanın digər şəhərlərində etirazlar başlayıb. Respublikanın baş naziri İrakli Kobaxidzenin sözlərinə görə, bu qərar qrant və kreditlərdən şantaj vasitəsi kimi istifadə edən avropalı siyasətçilərin qəbuledilməz hərəkətlərinə görə qəbul edilib.
