Jurnalist Aytən Məmmədovaya qarşı törədilən cinayətdən 44, ictimai fəal Bəxtiyar Hacıyevin naməlum şəxslər tərəfindən girov götürülməsindən və zorakılığa məruz qalmasında 2 ay ötür.
NOCOMMENT xəbər verir ki, Daxili İşlər Nazirliyinin Mətbuat Xidmətinin KİV və ictimaiyyətlə əlaqələr şöbəsinin rəisi, polis mayoru Elşad Hacıyev yeniavaz-ın sorğusuna cavab olaraq bildirib ki, hər iki məsələ araşdırılır və yeni bir məlumat yoxdur: “Aytən xanımın işi ilə bağlı istintaq gedir, hələ onunla bağlı hər hansı məlumat yoxdur. Bəxtiyar Hacıyevin işi də araşdırılır. Hər hansı məlumat olsa, bu barədə ictimaiyyətə məlumat veriləcək”.
Azərbaycan təhlükəsizlik orqanının əks-kəşfiyyat idarəsinin keçmiş əməkdaşı, təhlükəsizlik məsələləri üzrə ekspert Ərəstun Oruclu düşünür ki, bu cinayətlərin arxasında hər hansı bir dövlət rəsmisinin sifarişi, tapşırığı və yaxud iştirakı dayanır.
O, bu məsələ barədə fikirlərini bölüşərkən bildirib.
Ə.Oruclu Azərbaycana bu tipli cinayətlərin heç vaxt açılmadığını deyib: “Bəxtiyar Hacıyevə və Aytən Məmmədovaya qarşı törədilən cinayətlər təxminən 1-2 aydır araşdırılır, amma Azərbaycanda Elmar Hüseynovun qətli artıq 17 ildir araşdırılır və nəticə yoxdur.
Ümumiyyətlə, Azərbaycanda ictimai fəallara, siyasətçilərə, müxalifət və qeyri-hökumət təşkilatlarının nümayəndələrinə, hüquq müdafiəçilərinə, jurnalistlərə qarşı törədilmiş cinayətlərin biri də açılmayıb.
Açılmamasının yeganə səbəbi odur ki, bunun arxasında bu və ya digər şəkildə dövlətə bağlı və yaxud dövlətdə təmsil olunmuş şəxslər, fərdlər dayanır. Prosesin yeganə qeyri-adiliyi budur. Əgər Bəxtiyar Hacıyev və Aytən Məmmədova ilə bağlı törədilmiş cinayət qısa zamanda açılmadısa, deməli, bu heç vaxt açılmayacaq. Ona görə ki, istənilən cinayətin ən yüksək açılma ehtimalı onun isti-isti izinə düşülən zaman olur, yəni cinayətin izlərinin itmədiyi bir dönəmdə. Bu ümumi qəbul olunmuş bəlli bir praktikadır və statistika da təsdiqləyir. Azərbaycanda isə bu cinayətlər heç vaxt açılmır.
Ona görə, mən ilk gündən nə Bəxtiyar Hacıyevə, nə də Aytən Məmmədovaya qarşı törədilmiş cinayətlərin açılacağı haqqında düşünmüşəm. Ona görə ki, onlar açılmamalıdır. Ona görə ki, onun arxasında hər hansı bir dövlət rəsmisinin sifarişi, tapşırığı və yaxud iştirakı dayanır. Bu səbəbdən də açılmır. Aytən Məmmədova araşdırdığı “Nərmin işi”nə görə o təhdidə məruz qalıb. “Nərmin işi”nin açılmamasında maraqlı olan şəxslər yüksək dövlət vəzifələri tutmuş şəxslərdir, mən bunu dəqiq bilirəm. Və təbii ki, onların təsiri ilə də bu cinayət heç zaman açılmayacaq. O törədiləndə artıq təşkilatçıları bilirdilər ki, bu cinayət açılmayacaq. Çünki hakimiyyət hansısa bir jurnalistə görə 2-3 yüksək dövlət rəsmisini zərbə altına qoyacaq deyil. Bu qədər sadə…”
Xatırladaq ki, aprelin 21-də isə Bəxtiyar Hacıyev bir qrup şəxs tərəfindən girov götürülüb, təhdid, təhqir və fiziki zorakılığa məruz qalıb. May ayının 8-də isə Aytən Məmmədova bıçaqlı hücuma məruz qalıb. Ona qarşı törədilən cinayət Binəqədidəki 9-cu mikrorayonda, yaşadığı binanın liftində baş verib. Bəxtiyar Hacıyev isə Yasamal rayonu ərazisindəki M.Naxçıvani və Z.Əhmədbəyov küçələrinin kəsişməsində girov götürüldüyünü və başına qara torba keçirilərək naməlum istiqamətdə aparıldığını bildirib.
Aytən Məmmədova ona qarşı edilən bıçaqlı hücumun birbaşa peşə fəaliyyəti ilə bağlı olduğunu bidirib. O, Tovuzun Dondarquşçu kənd sakini Nərmin Quliyevanın qətlində təqsirləndirilən İlkin Süleymanovun məhkəmə proseslərini işıqlandırdığı üçün daha əvvəl də təhdidlərlə üzləşdiyini deyib.
B.Hacıyev isə onu girov götürən şəxslərin sosial şəbəkələrdə daxili işlər naziri Vilayət Eyvazovla bağlı paylaşdığı tənqidi postları zorla sildirdiklərini deyib. O bildirib ki, nazirlə bağlı tənqidlərini davam etdirəcəyi təqdirdə onu öldürməklə hədələyiblər.
Qeyd edək ki, sosial şəbəkələrdə polisin sözügedən hadisələrin araşdırılmasına laqeyd yanaşması ilə bağlı iddialar səsləndirilir. May ayının 14-də paytaxın Fəvvarələr Meydanında bu və buna oxşar hadisələrə diqqət çəkimək məqsədilə bir qrup jurnalist, ictimai fəal və hüquq müdafiəçisi yürüş keçirib, polisin fəaliyyətini tənqid edib.
