NOCOMMENT.az xəbər verir ki, İsrail quru əməliyyatı başa çatdıqdan sonra Qəzza zolağı ilə sərhəd yaxınlığında bufer zonası yaratmaq niyyətindədir. Bu barədə adı açıqlanmayan İsrail rəsmisi “The Times of Israel” nəşrinə bildirib.
Onun sözlərinə görə, Qəzza zolağından sərhəddə müəyyən təhlükəsizlik bufer zonasının yaradılması ona görə lazımdır ki, radikal Fələstinin HƏMAS hərəkatı artıq qüvvələri cəmləşdirmək və yəhudi dövlətini təəccübləndirmək imkanına malik olmasın.
“Bu, siyasi addım deyil, təhlükəsizlik tədbiridir. Biz Qəzza zolağından sərhədə bitişik ərazidə qalmağı planlaşdırmırıq”, – İsrail rəsmisi vurğulayıb.
Nəşr qeyd edib ki, İsrailin baş naziri Benyamin Netanyahu səfəri zamanı ABŞ dövlət katibi Entoni Blinkenlə bufer zona planlarını bölüşüb.
