İsrail ordusunun bir gecədə Qəzza zolağının müxtəlif ərazilərini bombalaması və atəşə tutması nəticəsində azı 24 nəfər həlak olub.
NOCOMMENT.az xəbər verir ki, bu barədə Qətərin “Əl-Cəzirə” telekanalı məlumat yayıb.
Onun sözlərinə görə, ən güclü zərbələr anklavın cənubunda yerləşən və İsrail Hərbi Hava Qüvvələrinin hücumları nəticəsində azı 11 fələstinlinin həlak olduğu Xan Yunis şəhərinə endirilib. Qəzza zolağının mərkəzindəki Deyr əl-Bələh şəhəri və şimaldakı Cəbəliyə şəhəri də kütləvi hava və artilleriya atəşinə məruz qalıb.
Martın 18-də İsrail ordusu Qəzza zolağında hərbi əməliyyatları bərpa edərək, anklav ərazisinə kütləvi zərbələr endirib və bununla da bu ilin yanvarında yaradılmış atəşkəsi pozub. İsrailin baş naziri Benyamin Netanyahunun ofisi bunu radikal Fələstinin HƏMAS hərəkatının danışıqlar zamanı vasitəçilər və ABŞ prezidentinin xüsusi elçisi Stiven Vitkoff tərəfindən irəli sürülən təkliflərdən imtina etməsi ilə izah edərək, sektordakı əməliyyatın məqsədinin bütün girovları azad etmək olduğunu bildirib. Radikallar hərbi əməliyyatların yenidən başlamasında İsrail və ABŞ-ı günahlandırıblar.
