Qırğızıstan Prezidenti Sadır Japarov güc strukturlarında genişmiqyaslı kadr dəyişikliklərinə start verib. Dövlət Təhlükəsizliyi üzrə Dövlət Komitəsinin (DTK) sədri Kamçıbek Taşiyevin səlahiyyətlərinə vaxtından əvvəl xitam verilməsi ilə bağlı prezidentin müvafiq fərmanı bu gün rəsmi şəkildə dərc olunub. Bu qərar ölkənin siyasi dairələrində ciddi rezonans doğurub və hakimiyyət daxilində mühüm dəyişikliklərin göstəricisi kimi qiymətləndirilir.
NOCOMMENT.az xəbər verir ki, DTK-nın rəhbəri vəzifəsinin icrası müvəqqəti olaraq Jumqalbek Şabdanbekova həvalə olunub. Kamçıbek Taşiyev bu posta 16 oktyabr 2020-ci ildə təyin edilmişdi və həmin dövrdən etibarən təhlükəsizlik blokunun əsas fiqurlarından biri kimi çıxış edirdi.
Kamçıbek Taşiyevlə hazırkı prezident Sadır Japarov arasında uzun illərə söykənən münasibətlər Qırğızıstanın ən möhkəm və təsirli siyasi ittifaqlarından biri kimi dəyərləndirilirdi. Onların əməkdaşlığı hakimiyyətə gəlişdən xeyli əvvəl, 2010-cu illərin əvvəllərində başlamışdı. Həmin dövrdə onlar bir sıra siyasi proseslərdə eyni mövqedən çıxış etmiş, 2012-ci ildə baş vermiş ortaq cinayət işi isə şəxsi bağlarını daha da gücləndirmişdi.
2020-ci ilin oktyabr hadisələrindən sonra bu tandem tam şəkildə formalaşdı. Sadır Japarov prezident postunu tutdu, Kamçıbek Taşiyev isə DTK-nın rəhbəri təyin olunaraq güc blokunun əsas dayağına çevrildi. Ekspert dairələrində onların ittifaqı ölkənin ən güclü siyasi duetlərindən biri hesab olunurdu və Taşiyev ətrafında baş verən hər hansı kadr dəyişikliyi hakimiyyət konfiqurasiyasında ciddi dəyişikliklərin əlaməti kimi qəbul edilirdi.
Son dövrlərdə siyasi çevrələrdə DTK rəhbərinin qarşıdan gələn prezident seçkilərində iştirak edə biləcəyi ilə bağlı şayiələr yayılmışdı. Lakin Kamçıbek Taşiyev dəfələrlə prezident yarışında iştirak etmək niyyətində olmadığını və Sadır Japarovu dəstəklədiyini bəyan etmişdi. Qırğızıstan mediası yazır ki, buna baxmayaraq, onun istefası ölkənin siyasi gələcəyi ilə bağlı yeni suallar doğurub. /KONKRET.az/
