Avropa Ukraynaya Rusiya ilə münaqişəni dayandırmağa kömək etmək üçün yeganə məsuliyyət daşımır.
NOCOMMENT.az Politico-ya istinadən xəbər verir ki, Avropa İttifaqının (Aİ) Xarici Əlaqələr və Təhlükəsizlik Siyasəti üzrə Ali Nümayəndəsi Kaja Kallas ABŞ prezidenti Donald Trampın bəyanatlarına belə cavab verib.
“Avropa Ukraynadakı müharibənin yükünü təkbaşına daşıya bilməz. Bu, xüsusilə prezident Trampın döyüşləri dayandıracağına dair vədini nəzərə alsaq, doğrudur. O, münaqişəyə son qoyacağını vəd etmişdi. Ona görə də bunun məsuliyyəti bizim üzərimizə düşə bilməz”, – Avropa diplomatiyasının rəhbəri qeyd edib.
Məqalə müəllifləri Trampın Ukrayna ilə bağlı bəyanatlarının “ABŞ-ın münaqişədən çıxmasına işarə vurduğuna və bununla da Ukrayna məsələsi üzrə məsuliyyəti Avropaya köçürdüyünə” inanan adı çəkilməyən Avropa rəsmilərinə istinad edib. Cavabında Kallas vurğulayıb ki, “Amerika tərəfi Şimali Atlantika Alyansı ilə həmrəy olmalıdır”, çünki Vaşinqton NATO-nun ən böyük müttəfiqidir.
Sentyabrın 23-də Ağ Evin rəhbəri bəyan edib ki, Ukrayna Avropa İttifaqının dəstəyi ilə təkcə öz ərazilərini qaytarmağa deyil, potensial olaraq “daha da irəli getməyə” hazırdır.
