Rusiya heç vaxt Ermənistan üçün Dağlıq Qarabağda vuruşmaq istəməyib.
NOCOMMENT axar.az-a istinadən xəbər verir ki, bu sözləri İnfo-24-ün efirində hərbi ekspert, “Milli müdafiə” jurnalının redaktoru İqor Korotçenko deyib.
Onun sözlərinə görə, Rusiya Prezidenti Vladimir Putinin Qarabağ və onun bütün ətrafının Azərbaycanın ərazisi olması barədə açıqlaması Moskvanın konfliktin əvvəlindən hansı mövqeni tutduğunu təsdiqləyir.
“Bu mesaj Rusiyanın Ermənistanı satması barədə hay-küy salanlara ünvanlanıb. Biz heç vaxt Ermənistan üçün Dağlıq Qarabağda vuruşmaq istəməmişik. Putin sadəcə illüziyalara qapılıb, bizə nəsə ünvanlayanlara cavab verdi. İlk növbədə etirazlarınızı öz-özünüzə edin: erməni cəmiyyəti, erməni dövləti, erməni politelitası – bütün sualları öz-özlərinə ünvanlamalıdır”, – deyə Korotçenko bildirib.
O əlavə edib ki, beynəlxalq hüquq baxımından da keçmiş Dağlıq Qarabağ Azərbaycan ərazisidir: “Rusiyanın da mövqeyi münaqişənin lap əvvəlindən belə olub”.
