Lavrov Bakıda olanda Laçın niyə atəşə tutuldu?backend

Lavrov Bakıda olanda Laçın niyə atəşə tutuldu?

  • whatsapp
  • messenger
  • telegram
  • vkontakte
  • odnoklassniki

Ermənistan Laçını yenidən atəşə tutdu: özü də Lavrovun Bakıda olduğu vaxt törədilən bu təxribat xüsusilə diqqət çəkir və son proseslər fonunda hücumun hədəflərini anlamaq mümkündür.

Birincisi, İrəvan sərhədin delimitasiyası prosesində istəyinə nail olmaq istəyir:

Lavrov Prezident İlham Əliyevin qəbulunda bildirdi ki, “Rusiya sərhədlərin delimitasiyası və demarkasiyası üçün yaradılmış iki komissiyanın xətti üzrə işə məsləhət xidmətləri göstərməyə də hazırıq, bu barədə konkret təkliflər var, onları Sizinlə müzakirə etməyə şad olaram” dedi. Moskva delimitasiya prosesində “hakim” rolunu qorumaq istəyir, təkliflər də bu yöndədir, amma bunun üçün Bakının mövqeyi nəzərə alınmalıdır. Ermənistan delimitasiyanın SSRİ dağılanda mövcud olan xətlər üzrə aparılmasını istəsə də, Azərbaycan SSRİ dövrünün, hətta XX əsrin əvvəlindəki xəritələrin əsas götürülməsini tələb edir və istisna deyil ki, Lavrovla müzakirə edilən məqamlardan biri də məhz budur. Delimitasiya komissiyası Moskvada keçiriləcək növbəti görüşə qədər bu məsələlər həllini tapmalıdır, çünki Rusiyanın marağında olan kommunikasiyasının açılması üçün sərhədin müəyyən edilməsi prosesi başlanmalıdır.

Lavrovun Bakıda danışıqlar apardığı vaxt ermənilərin təxribat atəşi açması “Delimitasiya prosesində Ermənistanın mövqeyi nəzərə alınmalıdır” mesajının çatdırılmasına hesablanıb.

İkincisi, açılan atəş Laçın şəhərinin Azərbaycana təhvil verilməsinə qarşı mümkün təxribatın başlanğıcı ola bilər.

10 noyabr razılaşmasına uyğun olaraq, şəhərin mərkəzindən keçən dəhlizin yeni marşrutunun hazırlanması sürətlə həyata keçirilir. Məlumatlara görə, yeni yolun ən tez 1 iyul tarixinə, ən gec ilin sonuna kimi istifadəyə verilə bilər. Bakıda Lavrovla bu məsələnin də müzakirə edildiyi mümkündür. Ermənilərin Laçın istiqamətində atəşkəsi pozması Laçın şəhərinin təhvil verilməsinə qarşı addımlara start verildiyi gözləntisini də ön plana çıxarır.

İşçi komissiyanın Moskvada keçiriləcək növbəti görüşünə qədər sərhəddə erməni təxribatlarının yenidən intensivləşəcəyi istisna deyil…

Asif Nərimanlı