Moskva nüvə sazişi üzrə Vaşinqton və Tehran arasında mümkün razılaşmaları asanlaşdırmağa hazırdır, bir şərtlə ki, bu cür razılaşmalar hər iki tərəf üçün məqbul olsun və İslam Respublikasının qanuni maraqları nəzərə alınsın.
NOCOMMENT.az xəbər verir ki, bunu Rusiyanın xarici işlər naziri Sergey Lavrov İranın xarici işlər naziri Abbas Əraqçi ilə danışıqların yekununda deyib.
“Biz kömək etməyə, vasitəçilik etməyə, İranın nöqteyi-nəzərindən faydalı olacaq və ABŞ üçün məqbul olan istənilən rolu oynamağa hazırıq”, – Rusiya Xarici İşlər Nazirliyinin rəhbəri bildirib.
Nazirin sözlərinə görə, Moskva yeganə variantın “sırf nüvə məsələləri üzrə razılaşma olmasından” irəli gəlir. “Və qeyd etmək istərdim ki, İran İslam Respublikası Nüvə Silahlarının Yayılmaması Müqaviləsi çərçivəsində razılaşma əldə etməyə hazırdır. Bu, danışıqları nüvə məsələlərinə aid olmayan məsələlərlə yükləməyə çalışanların nəzərə almalı olduğu fundamental məqamdır və bununla da çox riskli vəziyyət yaradır”, – Lavrov vurğulayıb.
Aprelin 12-də Maskatda Omanın vasitəçiliyi ilə ABŞ və İran nümayəndələri arasında Tehranın nüvə proqramı ətrafında yaranmış vəziyyəti həll etmək üçün dolayı danışıqlar aparılıb. İran nümayəndə heyətinə xarici işlər naziri Abbas Əraqçi, Amerika nümayəndə heyətinə isə prezidentin xüsusi nümayəndəsi Stiven Vitkoff başçılıq edib. İran Xarici İşlər Nazirliyinin məlumatına görə, görüş konstruktiv və sakit keçib və tərəflər məsləhətləşmələri davam etdirmək barədə razılığa gəliblər.
Omanda keçirilən danışıqlar iki ölkə rəsmiləri arasında 2022-ci ildən bəri ilk yüksək səviyyəli təmaslara imza atıb. Bu danışıqlar İranın nüvə proqramı ilə bağlı uzun müddətdir mövcud olan ziddiyyətləri həll etmək məqsədi daşıyır. ABŞ prezidenti Donald Tramp dəfələrlə bildirib ki, İran sazişi qəbul etməkdən imtina edərsə, güc tətbiq etməyə hazırdır.
