Bu il yay fəsli daxil olandan hava şəraiti qeyri-sabit keçdiyi üçün çimərliyə gedənlər demək olar ki, olmadı. Lakin bir neçə gündür ki, əsl çimərlik havası var və dənizə üz tutanların sayı-hesabı yoxdur. Ölkəmizin əsasən cənub rayonlarının sakinlərinin istifadə etdiyi çimərliklər Lənkəran ərazisində yerləşir.
NOCOMMENT.az xəbər verir ki, oxu.az buradakı çimərliklərin vəziyyəti ilə maraqlanıb.
Sakinlərin sözlərinə görə, bu il çimərliklərə giriş qiymətləri iki dəfə bahalaşıb:
“Ötən il giriş bir nəfər üçün bir manat təşkil edirdisə, bu qiymət bu il iki manatdır. Bu qiymətə yalnız boş stol-stul daxildir. Həmçinin bu il özümüzlə qarpız, yemiş və samovar gətirə bilmərik. Onları girişə qoyub, çimərliyə girməliyik. Bunu nəzarətçilər ətrafın zibillənməsi ilə əlaqələndirirlər”, – deyə sakinlər qeyd edir.
Sakinlər çimərliklərə gedən yolların keçilməz olmasından da gileylənirlər. Onların sözlərinə görə, yolların təmirsiz olması, nəqliyyat vasitələrinin tez-tez sıradan çıxmasına səbəb olur.
Qeyd edək ki, əksər Lənkəran çimərliklərinin özəl xüsusiyyəti var. Belə ki, çimərliklər maneələrlə iki hissəyə bölünür: bir tərəfdə ailələr, digər tərəfdə isə ancaq kişilər istirahət edir.
