Yoluxma sayında artım müşahidə olunsa da, koronavirusla bağlı vəziyyəti stabil qiymətləndirirəm.
NOCOMMENT.az xəbər verir ki, bunu Modern.az-a açıqlamasında tanınmış həkim-infeksionist Vasif Əliyev bildirib.
V.Əliyev qeyd edib ki, rəqəmlərin yüksək həddə çatacağı payıza proqnozlaşdırılır:
“Nəzərə alsaq ki, Azərbaycanla qonşu ölkələrdə də yoluxma sayı artır. Xəstəliyin ilk forması ilə indiki vəziyyəti müqayisə etsək, ağırlaşma dərəcəsi çox aşağı düşüb. Xəstəxanaya yatış ehtiyacı da əvvəlki dövrlərdə olduğu kimi deyil. Peyvənd faktoru da əsas məsələlərdəndir. İstər xəstəliyi keçirib sağalan, istərsə də peyvənd vurduran şəxslərdə yaranan immunitet onları qoruyur. Cəmiyyətdə qoruyucu antitelin olması gələcək fəsadlardan bizi qoruyacaq ən əsas amillərdən biridir”.
V.Əliyev deyib ki, yoluxma dinamikası artarsa, lokal məhdudiyyətlərin tətbiqinə başlanacaq:
“Pandemiya hələ bitməyib. Buna görə də insanlar ehtiyatlı olmalıdır. Ölkəmizdə də yoluxma sayı dünyadakı yoluxma sayı ilə paralel gedir. Yoluxma artarsa, Operativ Qərargah məhdudiyyətlər və qadağalar tətbiq edə, qərarlar verə bilər.
Qeyd edək ki, son sutkada Azərbaycanda 63 yeni yoluxma qeydə alınıb, 41 nəfər virusdan sağalıb. Hazırda ölkə üzrə aktiv xəstə 405 nəfərdir.
Qadağalar müzakirə mövzusu olaraq, ilk olaraq fərdi məhdudiyyətlərin tətbiqinə başlanılacaq. Ara məsafəsinin gözlənilməsi əsas tələblərdən biri ola bilər. Xüsusilə qapalı məkanlarda maska geyinilməsinin yenidən gündəmə gətirilmə ehtimalı var. Vəziyyət real qiymətləndirildikdən sonra digər məhdudiyyətlər tətbiq olunacaq”.
